Man City chak chian ber ṭum a thleng
Pep Guardiola enkawl Manchester City chuan Champions League match bika an chak chian ber ṭum an tawng. Premier League champion hian an mikhual Shakhtar Donetsk chu 6-0 in an sawp a, August 2016-a an record siam tawh (Steaua Bucharest 5-0) chu an khum.
Nilani zan khan Man City hi chak chiang hle mah se last 16 an la lut bik lo. Group F inkhel dangah player 10-a khel Hoffenheim chuan si hnih fai an phurh hnuah Lyon chu 2-2 in an inhnehtawkpui a, Pep-a naute tan match khat dang nghah leh rih a la ngai dawn.
A hnai tawh
A zawna a season ruk nan Champions League last 16 an lut hnai tawh a. Guardiola chuan, "Lut tura ngaih kan nih tawh hnuah kan nghah leh rih a la ngai a, tun anga ṭha hian khelh chhunzawm kan tum ang. Player tin an khel ṭha vek a, kan goal nawr a na takzet a ni. Kan la tling lo tih erawh kan la hre reng tur a ni a, tun anga ṭha hian kal zel kan tum ang.
"Lyon lakah awlsam takin kan chak mai lo a, Hoffenheim lakah pawh fiahna kan paltlang hram. Kan dinhmun hi him tak angin lang tawh mah se chetsual theih a la ni, chuvangin inthlahdah thei kan la ni lo," tiin a sawi. November 27 hian Lyon an lenchilh dawn a, an chak a nih chuan group hmahruaitu an ni chiang ang.
Shakhtar Donetsk lakah Gabriel Jesus chuan penalty vawi hnih a chhuih luh bakah hun tawp dawnah goal a khung a, Brazil international hi Alvaro Negredo leh Sergio Aguero te hnung zuiin Man City tan UCL bika hattrick siam thei pathumna a ni. Jesus bakah hian David Silva, Riyad Mahrez leh Raheem Sterling te chuan goal khat ṭheuh an khung bawk.
Goal ruk chu
Manchester City hian minute 13-na aṭangin goal an khung ṭan, captain Silva-a'n awlsam takin a khung a, goal luh nana Mahrez hna thawh sawi hmaih theih a ni lo. Sterling-a'n ball chip a tumna lamah a inchhuih tlu a, mahse referee Viktor Kassai chuan penalty a pe!
Striker Jesus-a'n a goal khatna khung nan hmangin, penalty hlawh chhuaktu Sterling bawkin mikhual tlarhnung a pal darh hnuah goalkeeper Andriy Pyatov dan theih lohin a khung - a hnuah Silva penalty hlawh chhuah chu Jesus bawkin a khung zui.
Ilkay Gundogan hnen aṭanga a ball hmuh chu Mahrez-a'n a awma la thlain an goal nga nan a khung a, an la duh tawk mai lo. Algerian international hian hun tawp hma deuhin Jesus goal khung tur a siamsak bawk a ni.
Penalty lo?
Minute 24-na a ni a, Sterling chuan an khingpui lam box chungah ball a tlan luh pui; Shakhtar defender Mykola Matviyenko nen an la inhnaihchilh lo a, goalkeeper Pyatov chu a dinna hmun
aṭangin a rawn tlan chhuak chauh bawk.
England internatinoal hian goal khung tumin a pet a, mahse ball ni loin lei a pet - khelmualah a tlu zui. Sterling hian penalty pawh a beisei lo, mahse 2011 Champions League final enkawltu referee Viktor Kassai chuan penalty a pe. Man City manager Pep chuan fourth official hnenah thutlukna dik lo a nih thu a sawi hial.
Spanish manager Guardiola chuan UCL-ah video assistant referee hman a thlawp thu a sawi zui a, "Referee te hian thutlukna dik tak siam an duh a, chumi pui tur chuan VAR a pawimawh. Zanin ang game rang lutukah kha chuan thil hmuh kim vek pawh a harsa ang, kan tan thil lawmawm ni mah se a khungtu zawk nih pawh a nuam chuang lo," a ti.
Hmabak Derby
Premier League champion lai Man-chester City hi season kal laiah pawh hmahruaitu an ni mek a, chutih rualin an chesual hlek a nih chuan Chelsea leh Liverpool ten an la tlanpel thei reng - an dinhmun a la him bik lo.
Pathianni zan hian Manchester United nen an intawng zui dawn a, inkhel hautak leh boruak sang an hmachhawn dawn vangin Shakhtar Donetsk lakah Guardiola-a'n a player ṭha ṭhenkhat a hahdam tir.
Defender Vincent Kompany leh Benja-min Mendy te chu squad-ah an awm lo a, striker Sergio Aguero leh forward Leroy Sane te chu bench-ah hun hman tir an ni thung. Silva, Kyle Walker leh Fernandinho te pawh thlak niin, Danilo, Gundogan leh Fabian Delph te khelmual chhungah hun an hmang ve thung.