Real 'tak tak' an inlar ta
Manager lailawk Santiago Solari enkawlna hnuaiah Real Madrid chuan match thum chhung a zawnin hnehna an chang ta. Nilaini zan khan an mikhualna ramah Viktoria Plzen chu 5-0 in an sawp.
Real Madrid tan Karim Benzema chuan goal hnih khungin Casemiro, Gareth Bale leh Toni Kroos ten goal khat ṭheuh an khung bawk a, Group G-ah hmahruaitu dinhmun an luah nghal.
European champion chak zanah Roma chuan chak harsatna hmunah CSKA Moscow chu 2-1 in an hneh ve bawk a, Real nen point kua ve ve an nei ta.
Real Madrid-in Roma nen an intawn tawhah hnehna an chan avangin group hmahruaitu an ni a, CSKA Moscow leh Viktoria tan beisei neih a harsat tawhin a rinawm.
Benzema = 200
Real Madrid tan Benzema chuan minute 20-na lekah goal hmahruai a khung a, Real tana goal 200 khung tling thei player pasarihna a ni - heti zat goal khung tur hian match 429 a mamawh.
Minute thum a liam hman chauh a, Real-in Casemiro hmangin goal an khung lehnghal a, Viktoria tan insiam
ṭhatna hun hman a awm lo. Benzema chuan hnai set sawt aṭangin minute 37-naah a tauh lut leh bawk.
Minute 40-na a thleng a, Gareth Bale hun a her chhuak ve leh. Welsh forward hian an goal lina a khung a, Champions League-a a inlan hnuhnung match riatah goal 10-a a inrawlhna chiah a ni - goal 10 khungin assist vawi nga a nei.
Toni Kroos chuan second half-ah chak nemnghehna goal a khung ve leh a, Real an chak chiang. Real tan match an khelh leh hmasak ber turah CSKA Moscow-in Plzen an hneh loh chuan Roma draw pui ringawt pawh an tan last 16 lut turin a tawk ang.
Coach thar Solari?
Real-in an coach tura Solari an lakluh ṭumin Real Madrid B team boss chu 'manager lailawk' a nih thu chiang takin an sawi a, an manager nghet nih tir tumna an nei lo.
Mahse, Argentine manager hoin match thum an khelhah an chak vek a, tunah chuan Solari hian Real a enkawl tlang mai law'ng maw tih chu zawhna awm a ni tawh a, a mak hran lo.
Solari hnuaia an match thumah Real hian goal 11 an khung a, goal an chhuah miah lo bawk. Julen Lopetegui hnuaia an hri vei pahnih goal khung theih loh leh tlarhnung pawp chu siamṭhat nghal a ni a, Solari hi fak loh theih a ni lo.
Player a nih laia Real tan pawha lo khel tawh coach hian team lian a la hmachhawn lo a, sawi nep theih erawh a ni chuang lo - Julen ho khan Vkitoria hi an hneh ve ngei a, an sawiselna chu goal an chhuah ve kher leh goal hnih chiah an khung kha a ni. Tunah erawh 5-0 in an sawp.
Mahni aiah player
Kil tin aṭangin Solari fakna a ri chhuak a, Argentine manager-in coach dinhmun a luah hnuah Real dressing room boruak rip tak chu a danglam nghal nia sawi a ni.
Mahse, Solari erawh a infak duh lo a, result an neih ṭhat chhan chu a player-te vang a nih thu a sawi. Kum 42 mi manager chuan, "Hei aia inpekna sang zawk chu beisei theih a ni lo. Player-te avanga he result hi hlawh chhuak kan ni a, fak phu an awm a nih chuan player-te hi fak phu chu an ni," a ti.
Solari chuan an hmabak atan inpuahchah an mamawh thu sawi nghalin, "5-0 a hnehna chan chuan mi zawng zawng an lawm ang. Mahse, kan hmabak match atan theihtawp chhuaha kan inpuahchah lehnghal a ṭul a ni," tiin a sawi.
Real captain Sergio Ramos a vannei takzet a, Spanish defender hian Milan Havel chu thisen chhuak khawpin nghawk lui mah se hnawhchhuah a ni lo.
Roma an chak
Real Madrid tlawm tawhna hmun CSKA Moscow khelmualah Roma an chak a, Russian club hi an mualah ngei 2-1 in an tlawm - last 16 an hnaih ta hle.
Italian club tan Kostas Manolas chuan minute lina lekah goal hmahruai a khung a, goalkeeper tawnhriat ngah Igor Akinfeev chetsual vanga lut a ni.
Mahse, second half ṭan a nih hnuah CSKA an insiamṭha a, Arnor Sigurdsson hmangin minute 51-naah an si phurh an sut - an hlim chhung erawh a rei lo hle.
Si phurh sutna goal an khung aṭanga
minute nga hnu lawkah Hordur Mag-nusson chu a yellow card pahnihna a hmuh avangin hnawhchhuah a ni a, Roma tan Lorenzo Pellegrini chuan goal khung zuiin an chak.