Man City lakah Man United tlusawp
Ṭhenawm bengchheng khan an football thiamna hmangin Premier League-ah ro an rel mek - Manchester khawpuiah meuh pawh Manchester City chu dinhmun ṭha zawk luahtu an ni mek a, an hmelma Manchester United hi kawng tinrengin an ngam.
Pep Guardiola thluak chu Ralf Rangnick enkawl Man United tan chelh rual a ni lo. Pathianni zan Manchester Derby-ah Citizens hian 4-1 in hnehna an chang, defender man tam Harry Maguire leh a ṭhian ten goal li 'chauh' an chhuah kha an vannei.
Man City hian match 28 aṭanga point 96 hmuin hma an hruai chhunzawm, pahnihna Liverpool aiin point rukin an sang - Reds hian match khatin an khel tlem zawk a, an inthlauhna hi a la danglam leh thei a ni ang.
A hmuhnawm nghal
Etihad Stadium-a inkhelah a tir aṭangin a 'changtupa' a chiang nghal - a hming chu Kevin de Bruyne a ni. Belgium international hian minute ngana lekah hnai tak aṭangin chiang zetin a khung, goal a khung dawn hian box chhungah ven lohin a awm!
KDB-a ball siamsaktu Bernardo Silva-a'n mual sir chep takah Aaron Wan-Bissaka a paltlang. English defender hian a ven tur lai a ven hneh loh vang a ni a, a laia awm Maguire leh Victor Lindelof ten De Bryune an ngaihthah kha a mak bawk.
Man United lamin rin loh takin an vaw let thei. Paul Pogba-a'n ball pass thiam bik a nihna a lantir a, ball dawngtu Jadon Sancho-a'n a khal dai mai dawn emaw tih hnuah goal lamah a pet thut, keeper Ederson tan dan theih a ni lo.
Chawlhlawk hmain Man City lamin goal an neih belh, a khungtu chu De Bruyne bawk a ni, mikhual tlarhnung pherh karah an goal hnihna a khung. Second half-ah pawh boruak a danglam tam lo, a chungnung ngai bawk an chungnung chhunzawm.
Belgium international De Bryune-a corner pet chu Riyad Mahrez-a'n a volley lut, khel fuh lo Maguire-a'n a lo tawh pial avangin United keeper David de Gea-a'n a dang hman lo. An goal lina pawh Mahrez -a'na khung a, VAR hmanga an endik hnua an pawm a ni.
City an ṭha tawk
Hamrik hmasa ber rik aṭangin Manchester City an chungnung, harsatna lian tham pawh an tawk lo. Sancho-a'n goal khat a khung lai khan Man United tawn san lai ber chu a ni mai awm e, a dangah chuan Pep-a naute an khan lo hle.
Guardiola team hian pressure nei lo an ni bik lo - chesual zauh se la chuan Liverpool lawmna an siam thei. Mahse, Spanish manager hian a naute a fuih ṭha tih a chiang, an hlauthawng eih lo; team nem tak hmachhawn ang mai an ni.
Man City manager Guardiola chuan, "Theih ni se chu match 10 khelh hmabak nei chunga champion kan tum. Mahse, tuna point ruka hma kan hruaina hi chu a lem mai a ni, an khelh hmabakah an chak ngei ang a, kan inkar a zim leh nghal ang.
"Ka duhthusamah chuan season tawp thleng champion tuma inel zingah tel ila tih hi a ni," tiin a ṭawng uang duh lo. Pep-a naute goal difference hi goal 50 a ni a, an elpui Merseyside club hi goal 51 a ni thung - team pahnih hi an la intawng dawn. Boruak a nung ṭha khawp ang.
United an buai
Hliam vangin Cristiano Ronaldo leh Edinson Cavani te an khel thei lo a, hripui vangin Raphael Varane leh Luke Shaw te an khel thei lo bawk - chhuanlam tham a ni. Mahse, City lam pawhin an defender pawimawh ber Ruben Dias an chhawr thei bik lo.
Inkhelh harsatna hmunah Man United lamin hruaitu ṭha an mamawh a, a buai ber chu captain Harry Maguire a ni lawi si! Goal hmasa pahnih a luh danah a hna a tlin tawk lo, goal thumna pawh a dan pial vanga lut a ni.
Match dang ang bawkin Bruno Fernandes a bo. Portuguese forward hi United a zawm tirh khan a che ṭha viau, mahse a rei tawlh tawlha a ṭha tulh tulh lem lo - a bikin Ronaldo nen an awmdun chinah a zuih zual emaw tih turin a awm.
Man United manager Rangnick chuan, "First half-ah ṭha takin khel mah ila 2-1 in kan hniam, goal mamawh hunah Marcus Rashford leh Jesse Lingard te dah lut mah ila vannei takin goal ṭha tak an khung belh leh si, a harsa ve bawk a ni," a ti.
Chinfel ngai
Sir Alex Ferguson a chhuah hnuah Man United hian season kua an hmang ta, champion tuma inel zingah an tel phak ngai meuh lo. Nikum khan pahnihna chu ni bawk mah se, champion City an phak lohna chu point 12 zet a tling.
Ferguson awm loh hnu hian player lei nan pound maktaduai 1,000 chuang an hmang tawh! Mahse, nomawi pathum chauh an la chawi belh; an hmelma Man City hian hetih chhung hian title 11 an lo la hman, thil fel tawk lo a awm tih chu phat rual a ni lo.
United hian beiseina sang tak nen Ronaldo an nei let a, mahse an mamawh chhanna a ni lem lo. Man City nen an inkhelh turah pawh boruak a nei. Rangnick chuan, "Zirtawpni khan doctor-in a dam loh thu min hrilh, a tukah pawh chutiang bawk chu," tiin Ronaldo chungchang a sawi.
Ronaldo hi kum 37 mi a ni tawh avangin beisei san chi a ni tawh lo. Hetihlai hian tlarhma lama an innghahna pakhat zawk Cavani pawh pawh kum 35 mi a ni tawh a, a vanglai a pel tawh. Man United hian hmasawn tur chuan it zawng ni loin, an mamawh player an lei thiam a ngai.