December 14-ah Alvarez a inlan dawn

Mexican boxer rothap Saul 'Canelo' Alvarez-a'n December 19-ah inhnek a hmachhawn dawn tih a chiang ta a, khawvel boxer ṭha ber pawla mi tam takin an ngaih hian WBA world super-middleweight champion Callum Smith a hmachhawn ang. 

Boxer pahnih inhnekna tur hmun atan United States of America chu tihchian a ni a, hetihrual hian an inhmachhawnna tur stadium tak erawh tihchian a la ni lo thung. 

Kum 30 mi Canelo hian WBA (Regular) super middleweight leh middleweight-ah kawnghren pahnih a kawl mek a, vawi 56 inhnek a hmachhawn tawhah vawi khat chiah a la tlawm. 

Vawi 53 chu hnehna a chang a, heng zingah hian vawi 36 zet a khingpui a knockout thei - vawi hnih a khingpui a inhnehtawkpui a, a hneh loh awmchhun hi Floyd Mayweather a ni. 

Boxing khawvel ngaihdanah chuan Saul Alvarez hi chak chiang sa a ni a, chutihrual chuan Callum Smith hi dah hniam theih a ni bik lo.

Liverpool khaw tlangval hian inhnek a hmachhawn tawh vawi 27-ah hnehna a la chang vek a, a khingpui vawi 19 zet a knockout thei - a nep lo hle. 

Kum 30 mi Smith chuan, "World champion ka nih hnuah fight liantham hmachhawn ka chak em em reng a, tun ang hun harsaa fan-te tana boxer ṭha pahnih inhnek kan chhawp chhuak thei tur hi ka lawm takzet.

"Saul hi ka hneh thei ang tih ka chiang a, middleweight hi ka awmna tur dik tak a ni tih pholan ka tum a ni," a ti a, hnehna chan a tum hle. 

Smith hian September 28, 2018-a George Groves hneha a middleweight kawnghren a hlawhchhuah hnuah  Hassan N'Dam N'Jikam leh John Ryder hmachhawnin hnehna a chang ve ve a, inhnek a hmachhawn hnuhnung ber hi November 2019 kha a ni. 

Alvarez-a'n inhnek a hmachhawn hnuhnung ber pawh November 2019 kha a ni a, WBO light heavyweight title hlawh chhuak turin Sergey Kovalev a hneh - December 19-ah inhnek hmuhnawm beisei a sual lo ang.