UCL khelh tum Arsenal

Arsenal tan kar tawp duhawm a ni. Manchester United leh West Ham United an chak loh laiin Gunners hian point thum hlu tak an hlawh chhuak. Season thara Champions League khel turin Mikel Arteta naute dinhmun a ṭha ta hle.

North London club hian match 25 aṭangin point 48 an hmu a, palina dinhmunan a luah - pangana Man United aiin match thuma khel tlem chungin, point khatin an sang zawk; March thla chhung ngeia kal fal hman an tum ang.

Pathianni zan Vicarage Road-a inkhelah mikhual lamain Martin Odegaard, Bukayo Saka leh Gabriel Martinelli te hmangin goal mawi pathum an khung a, mualneitu lam tan Cucho Hernandez leh Moussa Sissoko ten an khung ve bawk.

Goal khung lo mah se Alexandre Lacazette-a'n fak a phu. Ani hian Saka leh Martinelli ten duh tawka an shot theih nan remchang a siamsak - Saka pawhin Odegaard goal khung tur a siamsak bawk a, a tan season duhawm a ni zel.

Manager Arteta thlengin an phur, goal thumna an khung dawn hian Arteta-a'n pawna ball awm chu chharin Saka a pe vat a, ani hian rang taka ball tinungin an nawr let phut a, goal mawi tak an hlawhchhuah theih phah.

Arsenal hian March thla chhungin - Leicester City, Liverpool leh Aston Villa te an la hmachhawn leh ang.