Ruata'n professional cricket a chawlhsan

Mizoram chuan March 3-6, 2022 inkar khan Ranji Trophy-ah Nagaland an hmachhawna, 488 runs-in an chak lo. Plate group aṭangin khingpuite hneh vektu Nagaland-in point 19 hmuin second round an lut.

Mizoram cricket captain hmasa ber K. Vanlalruata chuan inkhelh hmain a chawlh tur thu a puang lawk a, Mizoram tana bat tura a luh hian Nagaland captain Rongsen Jonathan leh a hoten guard of honour an pe. Mizoram team pawhin veteran player hi inkhelhna hmun Eden Gardens dressing room-ah zahna chibai an buk leh bawk.

Durtlang tlangval Ruata chuan, "Mizoram tan kum 20 chhung ka lo khel ve tawh a, kum te lo upa ve ṭan a, tin rawlthar keimah aia ṭha zawkten min thlak a hun ve ta. Chuvangin professional cricket chawlhsan a hun ve tawh a ni. India ram cricket-ah Mizo hming a la lan ngei hi ka beisei tlat a ni," tiin Mizoram tana inkhelh a chawlhsan thu a sawi a, tualchhung cricket-ah erawh a la inlan thung ang.

Tun ṭum hi Ranji Trophy-a Mizoram chet ṭhat ber ṭum a ni a, match hmasa pahnihihah Bihar leh Manipur te an chelh. Nagaland pawh hi Mizoramin an chelh leh teuh hle.

Mizoramin vawm hmasak an thlang a, Nagaland-in first innings-ah 509 runs an siam. Mizoramin batter-te an chesual a, 95 runs chauhin an chhanglet.

Nagaland-in an tlin tawh tho avangin 'follow on' loin an bowler-te an hahdamtir a, batter-te tan inzirna hun remchang siamin 295 runs an siam tihin panga an thi a, an duh tawk.

Mizoram tan target 710 chu a sang hret a, amaherawhchu an dam tlang theih chuan inhnehtawk thei dinhmunah an ding. Second innings-ah opener pahnih Vikash Kumar leh Lalnunfela ten bul an ṭan chhe lo a, state pawn player Uday Kaul (6) leh Iqbal Abdulla (13) te erawhin ṭum dang an pha lo.

Team innghahna Taruwar Kohli-a'n thi loin 151 runs a siam a, Durtlang tlangval Ruata'n Mizoram point hlawhchhuahpui ngei tumin ball 82 zet a hmachhawn. Tawnhriat nei ṭha pahnih hi darkar thum chuang ding dunin an inkawpin 50 runs an siam thei a, Mizoram tan beiseina a awm thar.

Amaherawhchu Nagaland bowler Khrievitso Kense lakah Ruata a chesual a, Kohli-a'n dinpui tur batter ṭha a neih tak loh avangin over 93.4-ah 261 runs siamin an thi kim.

Mizoram hi plate group-ah a mawngphahah awm mah se match thum chauh an khel tawh chungin point hnih an hlawh chhuak thei a, ṭhenawm state-te la tluk lo nachungin hmasawnna hmuh tur a awm.