Warne thih danah rinhlelh tur awm lo

Australian cricket legend Shane Warne thih dan chungchangah Thai police chuan thuchhuah an siam a, post mortem exam aṭanga a lan danin rinhlelh tur a awm lo, an ti.

Kum 52 mi Warne hi Thailand thliarkar pakhat Koh Samui-a a inah kar liam ta Zirtawpni khan thia chhar a ni. Australian sorkar chuan Warne-a ruang hi an ramah an la let a, state funeral nen an thlah liam ang.

Warne hi khawvela leg spinner ṭha bera chhal a ni a, 1970s leh 1980s chhoah fast bowler-ten infiamna an thunun chu a rawn thlak. Australian spinner hian kum 15 chhung international career khelin Test wicket 708 a la a, wicket la hnem ber dawttu a ni.

1999 ICC World Cup khan Warne hian Australia a champion pui a, kum 2000 khan Wisden cricketers of the century mi panga thlan zingah a tel - Sir Donald Bradman, Sir Garfield Sobers, Sir Jack Hobbs leh Sir Viv Richards te nen huang khatah a awm.

Kum 2007 khan international cricket a chawlhsan a, hemi zawh hian commentator, pundit leh coach hna a thawk a ni.