Inter-in Reds lakah phuba lak theih an beisei

Champions League last 16 second leg chu zanin dar 1:30-ah khelh ṭan a ni leh dawn ta a, Inter Milan chuan khualmualah Liverpool an lenchilh dawn - team pahnih intawn hmasakah 2-0 in Liverpool an chak a, Italian club tan beisei a sang lo.

Mahse, Inter assistant manager Massimiliano Farris chuan beiseina an la neih tlat thu sawiin, "First leg-a kan result hi thlak danglam a harsa ang tih chu kan hria a, mahse, kan nauten theihtawp chhuah se kan duh," a ti a, a la beidawng lo.

Zanin dar 1:30-ah vek Bayern Munich an inlan dawn a, Red Bull Salzburg an mikhual dawn - German club hian first leg-ah mak takin Salzburg hi 1-1 in an inhnehtawkpui a, zaninah fan-ten result danglam an beisei ang.

A hunah tak
Inter-in San Siro-ah 2-0 a Reds an ngam loh hnu khan an insiamṭha nghal mai lo a, inelna hrang hranga match thum an khelhah an chak zo lo zui vek a, vawi hnih draw neiin vawi khat an tlawm.

Mahse, Anfield-a lenluh a hun dawnah Inter an insiamṭha a, Zirtawpni zan khan an mikhual Salernitana chu Serie A-ah 5-0 ngawtin an sawp - Lautaro Martinez chuan hattrick a siam a, team boruak a fuh leh tawh.

Liverpool tlarhnung tan Martinez hi ven bik tur a ni dawn a, Argentine striker bakah tun season-a goal 16 leh assist pariat neitu Edin Dzeko hi ngaihthah thiang lo tur an ni - player pahnih hi Reds-in an dah ṭhat theih phawt chuan tlang chance a sang ang.

Anfield inpeih ru!
Liverpool-in an ṭhat dan berin season an hmang chho leh ṭan tawh a, inelna hrang hranga an match hnuhnung 15-ah tlawm an nei lo a, League Cup nomawi an chawi tawh bawk - an phur vanglai tak a ni.

Mahse, Reds hian league champion tum inum boruak hahthlak karah, Inrinni zan khian Brighton & Hove Albion an mikhual dawn a, Jurgen Klopp-a'n a team a siksawi ve deuh a nih pawhin thil awm tak a ni ang. Reds hian Premier League, FA Cup leh Champions League an beisei vek a, Klopp tan player siksawi thiam chu thutlukna finthlak tur a ni.

He thu buatsaih lai hian Thiago Alcantara, Roberto Firmino leh Joel Matip te dinhmun a la chiang lo a, an inlan loh a rinawm zawk. Tlarhmaah pawh Mohamed Salah emaw Sadio Mane emaw tana chawlh hahdamna hun siam a, Diogo Jota a luhtir a nih pawhin a mak hran lo ang.

Harh a hun
Bayern-in first leg-ah rin loh takin Salzburg an inhnehtawkpui a, German club ropui hian tun hnai an result-ah chhuan tur an nei tlem hle. Austrian club an inhnehtawkpui hma hian VfL Bochum lakah 4-2 in an tlawm.

Match hnih an chak zawh loh hnu hian Greuther Furth (4-1) leh Eintracht Frankfurt (1-0) chu an hneh zui a, an insiamṭha taa ngaih a nih laiin kartawp inkhelah khan Bayer Leverkusen (1-1) an inhnehtawkpui.

Allianz Arena-a inkhel tur mah ni se Salzburg-in an mualah Bayern an chelh tawh avangin an hlau bik lo ang tih a chiang a, German club tan tun season-a goal 18 khung tawh Karim Adeyemi hi ven uluk a ṭul ang - Bayern hian match 34-a goal 39 khung tawh Robert Lewandowski an nei tih erawh hriat telsak a ṭha.

UCL Last 16
First leg
February 15, Thawhlehni
Paris Saint-Germain 1 - 0 Real Madrid
PSG: Kylian Mbappe 90+4'
Sporting Lisbon 0 - 5 Manchester City
MAN: Riyad Mahrez 7'; Bernardo Silva 17', 44'; Phil Foden 32'; Raheem Sterling 58'
February 16, Nilaini
RB Salzburg 1 - 1 FC Bayern Munich
RBS : Chukwubuike Adamu 21'
FCB : Kingsley Coman 90'
Inter Milan 0 - 2 Liverpool
LFC : Roberto Firmino 75'; Mohamed Salah 83'
February 22, Thawhlehni zan
Chelsea 2 - 0 Lille
CHE: Kai Havertz 8'; Christian Pulisic 63'
Villarreal 1 - 1 Juventus
VIL: Dani Parejo 66'
JUV: Dusan Vlahovic 1'
February 23, Nilaini zan
Atletico Madrid 1 - 1 Manchester United
ATM : Joao Felix 7'
MNU : Anthony Elanga 80'
Benfica 2 - 2 Ajax
BEN : Sebastien Haller 26' (OG); Roman Yaremchuk 72'
AJX : Dusan Tadic 18'; Sebastien Haller 29'

Second Leg
Zanin Inkhel tur
Bayern Munich 01:30 AM RB Salzburg
Liverpool 01:30 AM Inter Milan
March 9, Nilaini zan
Manchester City 01:30 AM Sporting Lisbon
Real Madrid 01:30 AM Paris Saint-Germain
March 15, Thawhlehni zan
Manchester United 01:30 AM Atletico Madrid
Ajax 01:30 AM Benfica
March 9, Nilaini zan
Juventus 01:30 AM Villarreal
Lille 01:30 AM Chelsea

* UCL-ah away goal rule a awm tawh lo.
* Second leg hi March thlaah khelh a ni ang.
* Quarterfinal aṭangin draw neih ṭhat leh tur a ni a, tute pawh an inhmachhawn thei ang.