Bowen a inhliam na lo

West Ham forward Jarrod Bowen chu kar liam ta Inrinnia Liverpool an hneh loh ṭumin hliam vangin minute 53-naah an thlak. Pathianni hian a ke artui hliam hi enfiah a ni a, a hliam na lo.

Hereford leh Hull player hlui Bowen hi Hull tana a khelhpui ṭhin Andy Robertson nen an insutnaah an inhliam. Kum 25 mi English forward hian khelh luih tum mah se a khel zui thei ta lo.

West Ham head of medical Richard Collinge chuan, "Jarrod hian MRI scan a nei a, vanneihthlak takin a hliam na lo. A dinhmun hi medical team-ten uluk takin an en chhunzawm ang," tiin a sawi.

Hammers hi Europa League group stage-ah hmahruaitu an nih avangin last 16 an lut nghal a, March 10, Ningani zanah Sevilla nen last 16 first leg an khel dawn. David Moyes-a hote hian March 13, Pathianni zanah Aston Villa an mikhual chhunzawm leh nghal bawk ang.