ISL-ah goal a lut hnem

Pathianni zan Indian Super League inkhelah goal riat ngawt a lut a, FC Goa leh Kerala Blasters te chu 4-4 in an inhnehtawk - result hian table erawh a tidanglam lo.

Blasters-in Goa an hmachhawn hmain semifinal an lut chiang tawh a, hnehna chang pawh ni se palina aia sangin season an khar thei lo bawk.

Kerala coach Ivan Vukomanovic pawhin an dinhmun a hrechiang a, hmun chang tam tawk lo player khelhna hun atan a hmang - Mizo midfielder K. Lalṭhathanga chu bench-ah a awm tluan.

Blasters tan hian Jorge Diaz chuan minute 25 chhungin goal hnih a khung a, a goal hnuhnung zawk hi penalty aṭanga lut a ni - awlsam taka chak tura ngaihna a lian hman.

Mahse, Goan club-in goal liin an chhanglet a, second half-ah bench aṭanga luhtir Airam Cabrera chuan hattrick a rawn siam a, Khasi tlangval Aiban Dohling chuan goal khat a rawn khung ve bawk.

Spanish striker Cabrera goal khung zinga pakhat hi penalty aṭanga a chhuih luh a ni a, kum 34 mi striker hian Goa a chakpui dawn niin a lang.

Mahse, Blasters boss Vukomanovic-a'n tlawm a duh lo - minute 88 hnuah Vincy Baretto leh Alvaro Vazquez te chuan goal khat ve ve Blasters tan an khung ve leh a, 4-4 in an ṭin.