February-ah FIFA Club World Cup khel dawn

Covid-19 in infiamna khawvelah nghawng a nei chhunzawm zel a, football khawvela thuneitu sang ber FIFA chuan Club World Cup, December-a a huaihawt ṭhin chu February-a khelh turin a sawn. 

Ruahman sa angin inelna erawh Qatar-in a la thleng dawn tho a, khawmualpui hrang hrang champion leh inelna thlengtu ram league champion-ten an khelh ṭhin Club World Cup hi February 1-11, 2021 chhunga khelh a ni ang.

Club World Cup khelh hun sawn a nih avangin kum 2009-a nomawi paruk chawitu Barcelona kha kum khata nomawi paruk chawi thei awmchhun an nih chhunzawm dawn. 

Season hmasa khan Bayern Munich chu treble champion an ni a, German Super Cup leh UEFA Super Cup-ah an champion bawk avangin Club World Cup-ah champion se chuan kum khat chhunga nomawi paruk chawi thei club pahnihna an ni ang. 

Mahse, Covid-19 vanga Club World Cup khelh hun sawn a ngaih takah chuan Bayern beiseina a thamral a, kum khata nomawi paruk chawia 'sextuple' record siam an tum chu an thei ta lo a ni. 

FIFA hian Club World Cup bakah FIFA Women's Under 20 leh Under 17 World Cup 2020 chu neih a nih loh tur thu an puang bawk - inelna pahnih hi a tirah kum 2021 atan sawn a ni zet a, mahse FIFA chuan uluk zawka a ngaihtuah hnuin khelh loh mai a thlang ta zawk. 

Hmeichhe U20 World Cup hi Costa Rica thlen tur a ni a, U17 hi India thlen tur a ni thung - mahse inelna kalpui theih a nih tak lohah chuan FIFA chuan ram pahnih hi kum 2022-a inelna thleng mai turin a ruat zui a ni.