Aizawl FC tan Kalandarov khel thei dawn

Vawiiin chawhnu dar 2:00 hian Aizawl FC-in 2021 I-League Qualifiers champion Rajasthan United an hmachhawn dawn. Mizo club tan chanchin ṭha a awm a, Tajik defender Bakhtiyor Kalandarov a khel thei tawh dawn.

Aizawl FC hian an match hmasa pahnihah Real Kashmir leh Mohammedan SC te an hneh lo a, point an la hmuh loh avangin table mawngphah an awm. Yan Law chuan, "Kan match hnuhnung pahnihah kan khel ṭha tawk lo ti kan hria, tuna kan awmna hi kan awm duhna hmun a ni lo. Bul kan la ṭan chauh a, a la insiamṭhat theih," tiin a sawi.

Mizo club tlarhnung a phui tawk lo a, match hnih khelh tawhah goal nga an chhuah. Tajikistan international defender Kalandarov rawn awm tur hi Aizawl FC tan chanchin lawmawm a ni a, tlarhnungah Robert Primus nen an inkawp thei a, defensive midfield-ah an chhawr thei bawk.

Chutihrualin player ṭhenkhat Covid-19 vanga chhawr theih loh tur an la awm. Cameroonian striker Aser Pierrick Dipanda, Samuel Lalmuanpuia, Anuj Kumar leh Ayush Dev Chhetri te an la hmang thei dawn lo.

Nimin khan Mohammedan-in Sreenidi Deccan chu 3-1 in an lehthal a, Mizo club laka goal hnih khungtu Marcus Joseph-a'n goal hnih bawk khungin Andelo Rudovic-a'n hun tawp hma hretin penalty aṭangin a khung belh bawk.

Round 3
Nimin Inkhel Result
Mohammedan 3 - 1 Sreenidi Deccan
MOH : Marcus Joseph 40', 51'; Andelo Rudovic 89' (P)
SRE : David Castaneda Munoz 16'

Vawiin Inkhel Tur
Rajasthan 2:00 PM Aizawl FC
Kenkre 4:30 PM RoundGlass Punjab
Churchill Brothers 7:30 PM Sudeva Delhi