Barcelona harhna a la kal zel

Substitute Ferran Torres leh Memphis Depay te goal hmangin Barcelona chuan Elche 2-1 in an lehthal a, manager thar Xavi enkawlna hnuaia harhtharna an chan chu an la chhawmnung zel - champion beisei ngam tawh lo mah se pahnihna erawh an la beisei ngam ang.

Pathianni zan La Liga inkhel dangah champion lai Atletico Madrid pawhin an elpui Real Betis 3-1 in an luhchhuah a, point 48 hmuin season thara Champions League khel phak chinah an inhlangkai ve bawk.

An chak zel
Chawlhlawk hma deuhin Elche lamin Fidel hmangin hma an hruai a, an goal neih hi an hum rei thei hle. Mahse, manager Xavi-a'n danglamna thlen turin Ferran Torres a dah lut a, Spanish forward hian a tana La Liga goal hmasa ber khungin si phurh a sut.

Manchester City player hlui hian goal hnihna pawh a khung teuh hle, mahse Elche keeper Edgar Badia chet ṭhat ni a ni a, a paltlang nawn thei lo; hun tawp dawnah erawh Depay-a'n penalty aṭangin an goal hnihna a khung ta tho.

Goal hmasa zawk an khung theih nan Ousmane Dembele a thawh hlawk, a ball cross chu Jordi Alba-a'n lo tawk pial mah se, awmna tur hmun dik taka awm Torres tan buaina tur a awm lo, an lei chhan a tihlawhtling.

Catalan club hian tun hnai an match hnuhnung paruk zinga paliah goal li an khung tling, an player thar Pierre-Emerick Aubameyang-a'n match liah hian a khung vek. Elche lakah Auba-a'n khung lo mah se an mamawh zat goal an sualchhuak thei ta tho a ni.

Atletico an chak
Champion lai Atletico Madrid chuan nomawi beisei ngam tawh lo mah se an inthlahdah ngawt chuang lo, palina ni phak turin thapui an thawh a ngai. Diego Simeone-a naute hian Joao Felix-a goal hnih bakah Thomas Lemar goal khat hmangin Real Betis an hneh.

Atletico tan hliam damkawr Antoine Griezmann a inlan thei tawh. France international hian Lemar-a goal khung tur a sual chhuak a, season tawp lam hun pawimawhah a theihna pholang chhunzawm se tih chu Atletico fans duhthusam a ni ang.

Goal hnih khungtu Felix chuan, "Boruak ṭha leh nuam tak kan nei mek, khelmual pawn lam boruak dang deuh kha chu kan kal pel tawh," a ti a, keeper Jan Oblak pawhin a tawp thlenga an beih tur thu a sawi ve bawk.

Atletico hi palina ni mah se hmahruaitu Real Madrid chu point 15 zetin an la phak lo. Real Betis pawh an dinhmun a ṭha bik lo - Atletico an hmachhawn hma khan pathumna an ni, tunah erawh panganaah an tlahniam nghal a ni.