Mamawh chhanna Olivier Giroud

AC Milan chuan Olivier Giroud-a goal khat hmangin Napoli an hneh a, point 60 hmuin Serie A hmahruaitu an ni leh ta. Milan hian an hmelma Inter Milan aiin point hnihin an hmu hnem zawk, mahse match khata an khelh hnem avangin an dinhmun a la him chuang lo.

Pathianni zan inkhel pawimawhah Giroud hian minute 49-naah goal awmchhun a khung. Season kal laia a goal khung hmasa 10 hi San Siro-ah vek a khung a, tunah chuan khualmualah goal pawimawh leh hlu bik a khung ta.

Kum 35 mi Giroud hian hmanni lawk khan Inter Milan lakah goal pawimawh a lo khung tawh bawk, a kum tam deuh tawh mah se a hunah a la rah thei reng - Milan lawmna belhchhah turin Zlatan Ibrahimovic chu bench aṭangin a lut thei ve leh tawh bawk.

Milan manager Stefano Pioli chuan, "Team ṭha tak hneh chungin point thum hlu tak kan hlawh chhuak. Champion sawi erawh a la hun lo, champion lai leh hmahruai leh mai thei Inter an awm tih kan hriat a ngai," a ti.

Inkhel dangah Juventus chuan Alvaro Morata goal khat hmangin Spezia 1-0 in an hneh. Turin club hi tun hnai inelna hrang hrang an khelh hnuhnung 14-ah an tlawm lo, season tharah Champions League an khelh ngei a rinawm.

Italy - Serie A
Bologna 0 - 0 Torino
Fiorentina 1 - 1 Verona
Venezia 1 - 4 Sassuolo
Juventus 1 - 0 Spezia
Napoli 0 - 1 AC Milan