Inkhelh lai buaina chhuakah mi 26 inhliam

Mexican top flight league-a Queretaro leh Atlas inkhelah buaina a chhuak a, La Corregidora stadium-a buaina chhuak avang hian mi 26-in hliam an tuar.

Queretaro leh Atlas inkhelah hian minute 63-naah buaina hi a chhuak a, player-ten buaina chhuak hi ṭhelh tum mah se ṭhelh rual a ni lo a, hmun him lamah player-te hi hruai an ni zui nghal a ni.

Mexican football-a buaina chhuakah hian hliam tuar mi 26-te chu damdawi inah hruai an ni a, Queretaro state governor Mauricio Kuri chuan, "Mi pathum chu chhuah leh nghal an ni a, pathum erawh an dinhmun a ṭha lo hle.

"Mi 10 chu dimdawi taka enkawl ngai an la ni a, mi 10 dang erawh an serious lo," tiin a sawi a, thi awm lo mah se buaina chhuak chu, "Chhiatna rapthlak tia sawi chi loh rual a ni lo," a ti bawk - Kuri hian thi an awm loh thu sawi mah se fans ṭhenkhat chuan an ṭhiante thih thu an sawi a, he thu buatsaih lai hian thu chiang a la awm lo.

Liga MX president Mikel Arriola chuan buaina chhuak avanga hliam tuarte an tawrhpuizia entir nan Pathianni match zawng zawng an sawn thu a sawi a, Queretaro leh Atlas inkhela buaina a chhuah lai hian mikhual team Atlas hian 1-0 in hma an hruai mek a ni.

Mexican league sang ber hotupa Arriola chuan, "Stadium-a venhimna ṭha taka kalpui thei lote lakah hremna na tak pek a ni ang," a ti a, "Player-te leh fan-te himna hi kan ngaih pawimawh hmasak ber a ni," a ti bawk.

Football khawvela thuneitu sang ber FIFA pawhin buaina chhuak chu, "Pawm dam theih loh leh ngaih zam theih loh," tiin an sawi.

FIFA chuan sawi zawmin, "Buaina chawk chhuaktute laka hremna pe ngei turin thuneitute kan beisei a, he thil thleng avanga harsatna tawkte pawh kan hre reng a ni," a ti a, Mexican thuneitute chu pawikhawihtute laka hremna lekkawh turin an phut.