Premier League-ah entu an awm hnai

United Kingdom sorkar chuan infiamna hmuna fan-te an kir leh theih dan tur an ngaihtuah mek a, khawthlang media-ten an tarlan dan chuan UK sorkar hian December-ah chuan England-a hmun ṭhenkhatah chuan fans awm ngeia infiamna huaihawt theih an beisei. 

UK prime minister Boris Johnson chuan Thawhṭanni khan MP ho hnenah infiamnaa fan-te an kir leh theih chu mimal tak pawha a ngaihpawimawh a nih thu a hrilh a, Department for Digital, Culture, Media and Sport chuan hmalakna nei nghalin Covid-19 kai tlemna hmunah fan-ten stadium an pan leh theih dan an ngaihtuah mek. 

Thawhlehni khan UK sorkar chuan, football lama thuneitute nen fan-ten inkhel an en leh theih nan  inbiakna hlawhtling tak an neih thu an sawi a, he hunah hian sum leh pai bakah kalphung thlak danglam chungchang thlengin an sawi. 

Tun hnaiah Covid-19 a darh leh avangin UK-a infiamna lama inhmangte chu April, 2021 hmaa entu neih theih beisei lo tura hrilh an ni a, mahse sum tam tak an hloh ve reng avangin UK sorkar chuan club-te sum hloh  tam lutuk tur ven nan heti zawng hian hma a la leh ta niin a lang.

UK-ah hian March aṭang khan stadium-ah fan-te an kal khawm thei tawh lo a, sorkar ruahmanna hmasa angin October 1-ah fans an punkhawm theih beisei ni mah se Covid-19 in ziaawm lam a pan loh avangin ruahman anga kal theih a ni lo. 

Hetihlai hian UK-a art venue ṭhenkhat O2 leh Royal Albert Hall-ah mi 5,000 thlenga punkhawm phalna a awm avangin mipui zingah lungawi lohna leh duhsak bik awm anga sawina a tam a, hei hian infiamna lama hmalakna thlengin a nghawng niin a lang - mi 200,000 zet chuan stadium-a fans an kir theih nan hmalaknaah an hming an ziak tawh. 

Sorkar ruahman anga fan-te hi stadium-ah an kir thei a nih chuan 'Tier One' leh 'Tier Two' a ṭhenin, a indawtin fan-te an kir ang - hei erawh UK lockdown neih mek, December 2-a tawp tura ruahman chu a tawp theih leh theih lohah a innghat ang.