France tan Giroud a vul

UEFA Nations League-ah France-in League group 1-a pakhatna dinhmun sawhnghet turin Sweden 4-2 in an hneh a, Chelsea striker Olivier Giroud-a'n goal hnih a khung. 

Stade de France-a inkhelah hian Sweden-in finals lut tawh France lakah goal an khung hmasa zawk. Viktor Claesson-a'n minute lina lekah mikhaul team tan a khung a, amaherawhchu Giroud-a goal hnih leh Benjamin Pavard (36') te hmangin Les Bleus-in an chhanglet. 

League A khel chhunzawm tura point hmuh mamawh Sweden-in Robin Quaison hmangin minute 88-naah siphurh sut ṭhen mah se mualneitu tan Kingsley Coman-a'n injury time-ah a khung belh.

France football-a player ropui sawi chuan Michel Platini (41), David Trezeguet (34), Zinedine Zidane (31), Just Fontaine (30), Jean-Pierre Papin (30), Youri Djorkaeff (28) leh Karim Benzema (27) te an ropui. 

Amaherawhchu heng player ropui zawng zawng ai hian Giroud-a'n Les Bleus tan goal a khung tam zawk. Arsenal striker hlui Giroud hian FIFA World Cup-a France an champion ṭumin goal khung lo mah se ram tan goal 44 a khung tawh avangin a record hi sawi nep theih a ni lo.

France leh Arsenal legend Thierry Henry-a'n goal 51 a khung a, kum 34 mi Giroud tan record nihrual turin goal sarih chiah a ngai tawh. Chelsea-ah French striker hi chhawr tam lo mah se Didier Deschamps erawhin a hmang thiam a, France ram record a hnaih zel.

Hriat tel tur erawh player khel lai zingah Antoine Griezmann-a'n goal 33 a khung tawh a, Barcelona forward hi kum 29 mi chauh a la nih avangin Giroud-a'n record a siam ta lo a nih pawhin Henry record siam hi a him chuang lo.

France coach Didier Deschamps-a'n Paul Pogba chungchang a sawi tawh a, French midfielder hi Manchester United tan khel tam se a duh. Chutiang bawkin Olivier Giroud hi Chelsea tana a khel tam lo a nih chuan Deschamps-a'n khelhna hmun a chan reng loh tur thu a sawi.

Deschamps chuan, "Giroud hian thil awm dan a hria, tuna a awm ang hi chuan a awm reng thei lo ang. March thla hmain a dinhmun a siam ṭhat a ṭul. Player-te hi thurawn ka pe ṭhin a, a tawpa thutlukna siamtu chu player an ni," tiin Sweden an hmachhawn hma hian French striker chungchang hi a sawi.

Giroud hian Frank Lampard-a hnuaiah khelhna hmun a chang pha meuh lo. Tun season-ah Giroud-a'n Premier League-ah vawi thum chiah a la khel a, Timo Werner leh Tammy Abraham te aiin rin a hlawh lo zawk.

Nakkuma khelh tur European Championship hi Giroud tan a pawimawh dawn avangin January thlaah French striker hian London club hi chhuahsan a duh a nih pawhin a mak lo ang.