Australian Open buai chhunzawm

Nakkum January thlaa khelh tur Australian Open dinhmun a chiang lo chhunzawm zel. Australia ram chhim chhaka awm Victoria chuan kumin December thla laihawlah chuan mikhual thlen an la duh loh thu an sawi.

Tennis Australia lamin an ruahman dan chuan January thlatir hian Grand Slam inbuatsaih nan tournament tenau an buatsaih ang, inelna hmachhawn tute chu khung hran niin Australian Open khel chhunzawm nghal thei tura ngaih an ni ang.

Mahse, sorkar thuneitu lamin mikhual thlen danah thutlukna an la siam fel vek thei lo. Ram tam zawk chuan ram dang aṭanga mikhual an thlente chu hmun danga an kal darh hmain ni 14 vel an khunghrang vek ṭhin.

January thlaa tournament khel tur chuan player tam tak chuan December thla laihawlah Australia an pan a ngai tihna a ni a. Tennis Australia lamin player kalkhawm hmasak nana hman an tum Victoria chuan mikhual thlen an la duh rih lo a ni.

Victoria sorkar thuneitu Daniel Andrews chuan, "Harsatna leh buaina hrang hrang chu a awm ngei a, eng tianga chin fel tur nge tih pawh sawi fel a la ni lo.

Amaherawhchu Tennis Australia nen hma kan la a, buaina karah pawh Australian Open khelh kan beisei," a ti.

Australian Open mipa singles champion lai Novak Djokovic chuan inelna neih ngei a duh thu a lo sawi ve tawh bawk. Melbourne khawpuia inelna lianah hian Serbian star hi vawi riat ngawt champion tawhin record nei ṭha ber a ni hial.

Covid-19 vangin tennis season chu kalphung pangngaiin a la kal thei rih lo. Season thar pawh hi hrileng hian na takin a nghawng ngei dawn tih a lang, inelna ṭhenkhat chu neih theih loh emaw a hun pangngaia khelh theih loh a awm leh ngei ang.