Vettel-a'n Hamilton a dah sang

Sebastian Vettel chuan a elpui Lewis Hamilton hlawhtlinna a lawmpui a, Britain tlangval chu tunlai khawvela Formula 1 driver ṭha leh chungnung ber a nih thu a sawi.

German driver Vettel leh Hamilton te hi an inel tawk thei hle, world champion vawi li ve ve ni rual tawhin chungnung zawk sawi an harsa thei viau. Mahse, Ferrari a zawm hnuah Vettel a zuih a, a elpui Lewis erawh Mercedes car nen hma a sawn hle thung.

Ferrari tana contract hmang zo tur Vettel chuan, "Tun hma lama mi ropuite nen Lewis hi khaikhin theih ngawt a ni lo, tlankawng pakhatah a ruala an intlansiak loh avangin a chungnung zawk sawi a har hle.

"Chiang taka sawi theih erawh tunlaiah chuan F1 driver ṭha ber a ni a, midang tan elphak pawh a harsa hle. Driver ropui chawl tawhte kha chu tunlai car nen hian an hlawhtling lo mai thei, keini pawh an hunlai car nen khan kan champion bik lo thei bawk," a ti.

Mercedes driver Hamilton hian world champion nih tam lamah Micheal Schumacher a nih rual tawh a, vawi sarih a champion tawh. Pole position chan hnem leh podium lawn hnem lamah chuan German legend hi a khum vek tawh.