Vawiin tlai dar 1:00-ah BC Roy Trophy Final Mizoram Vs Punjab

National Junior Football Championships for BC Roy Trophy final chu vawiin tlai dar 1:00 hian JN Stadium, Shillong-ah khelh a ni dawn. Final-a inhmachhawn tur Mizoram leh Punjab hian nomawi bakah 'chungnunna' an inchuh tel ang.

India ram football huangah Mizoramin kua a hreuh thuk zel a, hmarchhak state zinga Manipur elpui ṭhin khan Meghalaya nen inkhelh thiam zawk state nih an inchuh chho a. Tun ṭum inelnaah hian Mizoramin inelna thlengtu Meghalaya hi semifinal-ah an hneh.

Hmarchhak state chauh duh tawk loin Mizoram-in India ram awp turin ṭan an khawh chho a, tum ram la thleng chiah lo mah se sulhnu nei ṭha state West Bengal ai pawhin tun hnaiah record an nei ṭha zawk tiin a sawi theih hial. Chutihrualin Mizoram ṭhan ang bawkin state dang pawhin hma an sawn a, tun hnai bikah chuan Punjab hi Mizoram elpui ber tia sawi theih an ni.

Mizoram hi 2014 khan Santosh Trophy-ah an champion a, kum 2015-ah Mizoram hian National Games football-a gold la turin Punjab hi 1-0 in an hneh. Mizoram tan chuan chanchin duhawm a ni a, a vawi khat nana Santosh Trophy an champion zawh chiahah National Games-ah a vawi khat nan gold an la lehnghal.

Punjab-in phuba an rawn la zui a, kum 2015 Santosh Trophy semifinal-ah Mizoramin penalty shootout hmangin an hneh lo. 2017 Santosh Trophy final round-ah group khatah awm hoin goal awm loin an inhnehtawk a, Punjab an tlak laiin Mizoram erawhin semifinal an thleng.

Kum 2018-ah Mizoramin semifinal an thleng a, group stage-ah Punjab 2-1 in an hneh. Nikumah erawh Mizoramin final round an thlen zawh loh laiin Punjab-in final an thleng thung.

I League lamah pawh Mizoram club Aizawl FC-in 2016-17 season khan nomawi an chawi a, hmarchhak state zinga I League nomawi chawi thei awmchhun an ni. Punjab club zinga a hmasa ber ni turin Minerva Punjab-in 2017-18 season-ah I League nomawi an chawi ve thung.

Minerva Punjab hian academy ṭha taka kalpuiin AIFF hnuaia club tana buatsaih kum bithliah inelna hrang hrangah an champion vek tawh a, India-in FIFA Under 17 World Cup a thlen pawhin player pali lai an thawh thei bawk. India ram football-ah Punjab an lian tih zep rual a ni lo.

BC Roy Trophy hi India ram pum kum bithliah inelna a ni a, chutihrualin tun hnaia final inhmachhawnte thlir chuan Mizoram leh Punjab inelna ang hiala sawi theih a ni.

Tun ṭum hi BC Roy Trophy final hnuhnung pangaa Mizoram leh Punjab vawi li an inhmachhawnna chiah a ni a, hei vang hian nomawi chiah an inchawi lo - chungnunna an inchuh tel. Punjab hian 2015-16 khan Hoshiarpur-ah Mizoram hi penalty shootout hmangin an hneh a, 2016-17 khan Bhilai-ah 3-0 ngawtin an hneh leh bawk.

Amaherawhchu Mizoram hian nikum final-ah Punjab hi Cuttack-ah 2-1 in an hneh a, kum 2013-a a vawi khat nana nomawi an chawi khan semifinal-ah an hneh. Mizoram coach Vanlalpeka Ralte pawhin Punjab hi hmeichhe team a enkawl ṭumin a hneh a, a inkhelh hun laiin ṭum khat hneh bawkin tun hi vawi thum a hmachhawnna chiah tur a ni.

Mizoram tan tun ṭum hi BC Roy Trophy vawi thum an champion theihna tur chiah a ni a, inkhel pawimawh a ni. An khingpui tur Punjab hian final thleng turin goal an chhuah lo a, an striker Seilenthang Lotjem-a'n goal kua an khung zinga goal sarih a khung.

Mizoram coach Vanlalpeka Ralte chuan, "Nikum final-ah kan hneh tawh a, kuminah pawh hneh turin kan inringtawk. Meghalaya-ah Mizo ṭhahnem tak an awm a, ṭawiawmtu pawh kan neih ṭhat ngei ka ring. Player pakhatah kan rilru kan sawrbing dawn lo a, team angin kan khel ang," tiin Punjab goal khung khawl Seilenthang a hrana an ven bik loh tur thu a sawi.

Punjab coach Pardeep Kumar chuan, "Mizoram hi final-ah vawi hnih hneh tawh mah ila tun ṭuma final-ah hi chuan kan history-in min pui lo ang. Mizoram tan chuan Shillong hi chu an mual ang maia chhal theih a ni a, final-ah pawh an dinhmun a ṭha zawk. Amaherawhchu ka naute ka ringtawk a, fimkhur taka khelin kan hneh thei ang," tiin a sawi ve bawk.

Mizoram manager Hmingthansanga chuan Shillong Mizote aṭanga ṭawiawmna ṭha an neih a beisei thu Vanglaini a hrilh.

Hmingsanga chuan, "Shillong group YMA leh MSU te hnen aṭangin min ṭawiawm tur thu min hrilh a, kan lawm hle. Shillong-ah hian Mizo ṭhahnem tak an awm a, final-ah hian kan player 12-na an ni thei ang," tiin Vanglaini a hrilh a, player an dam ṭhat thu a sawi tel bawk.

Mizoram team enkawltute hi Hmingthansanga (manager), Vanlalpeka Ralte (coach), F. Lalrozara (asst coach) leh Lalpekhlua Chenkual (physio) te an ni a, kum 2013 leh 2019-a Mizoramin BC Roy Trophy an champion ṭumin Hmingsanga hi manager a ni.