La Liga President-in Messi chhuah pawi ti lo

La Liga president Javier Tebas chuan Lionel Messi chhuak dawn mah se a inpeih thu a sawi a, hetihlai hian Argentine forward lalut thei tura a ngaih Manchester City a sawisel zui.

Messi hian August thla khan Barcelona chhuahsan duhin chhuah dilna lehkha a theh lut a, mahse club lamin an chhuah phal loh hnuin court-a kal duh loin a chhuah dilna hi a hnukdawk. 

Tebas chuan Messi hi Spain-ah cham turin duh mah se a chhuak a nih pawhin Barcelona thiampuipa tel loa an kal theih tur thu a sawi. 

Messi hian tun season tawpah a duh chuan a thlawnin Barcelona a chhuahsan thei dawn a, kum 33 mi ni tawh mah se a thiam a la theihnghilh loh avangin a thlawna Messi lakluh theih hi European club tam tak tan hlawk tak a ni ang. 

La Liga President chuan, "Messi hi La Liga-ah cham se kan duh a, mahse Cristiano Ronaldo leh Neymar chhuah hnuin La Liga-a danglam phah lo. Messi tel loa hun hmang turin kan inpeih a ni," a ti. 

Tebas hi ṭawng pawr viau mah se Messi-a chhuah chuan an tuar dawn tih a chiang sa - Argentine forward boruak ang nei phak player La Liga-ah an awm lo a, Spanish top flight football hlutna a hniam sawt ang. 

Tebas-a'n Ronaldo leh Neymar an chhuak chung pawhin La Liga an buai phah lo niin a sawi a, a chhan lian tak chu Messi a ni - a sawi ang em hian talbuai phah lo tawp ni lo mah se an boruak thi lutuk tur chhem nungtu chu Messi a ni. 

Ronaldo chhuah hnuah El Clasico hlutna a tlahniam tih loh rual a ni lo a, Real Madrid-in Messi el pha an nei tlat lo. Neymar-a'n Paris St-Germain a pan hnua French football-in ngaihven a hlawh zui dan en chuan Brazilian forward awm lo hi La Liga-in a tuar tih pawh a lang. 

Messi hian La Liga chhuahsan ta se Barcelona-ah thiamna leh boruak len lamah Messi pheikhawk hnutchhiah zo taka inthawlh tur an awm lo a, Real Madrid leh Atletico Madrid-in Messi boruak hnaih phak player kawl an nei lo. 

Tebas-a'n Messi a chhuah chuan City a pan a ring a, English club hi a sawizel zui. La Liga hotupa hian City hi an sum hman dan zepah a lo puh tawh a, mahse July khan infiamna khawvela roreltu sang ber Court of Arbitration for Sport chuan City hi Financial Fair Play dan bawhchhiaa puhnaah thiam a lo chantir tawh.

La Liga hotupa chuan, "Premier League club zinga Messi lakluh chungchang sawi awmchhun chu City an ni a, dan piahlama che an ni. Hei hi keimah chauhin ka sawi lo a, vawi tam tak ka lo sawisel tawh bawk. City hi Covid emaw hri leng emawin a tibuai ve lo a, a chhan chu sum hman dan danglam tak an nei bik a, chumi elpui chu a har em em a ni," a ti.

City chuan Tebas-a sawiselna hi chhan loh an thlang a, Covid-19 vanga buai ve lo anga sawi erawh a dik lo niin a lang - nipui transfer-ah khan ren lo taka sum hmang ṭhin manager Pep Guardiola-a'n players hralhna paih hnua sum a sen zat chu pound maktaduai 31 a ni. 

Tebas-a'n Messi chungchang a sawina hi La Liga sum dinhmun a sawinaah a ni a, he hunah hian Barcelona-in club dang zawng aiin ngaihven an hlawh. 

Barca hian July khan Covid-19 avangin an leiba a pun thu an sawi a, an lei ba neihsa pound maktaduai 194.5 aṭangin 437.4-ah an lei ba a sang chho a, kum khatah pound maktaduai 86.9 an hloh bawk. 

Mahse, Tebas chuan journalist pakhatin administration-a Barcelona an awm mai a hlauhthawnawm chungchanga a zawhna chu chhangin Barca sum dinhmunin zia lam a pan leh tawh niin a sawi a, Catalan club chauh ni loin club dang pawhin an sum buaina chinfel nan hlawh tihhniam lama hma an lak a pawimawh thu a sawi bawk. 

Tun hnaia Barcelona talbuaina chhan lian tak pakhatah club president Josep Maria Bartomeu puh a ni a, October khan a hna aṭang hian banna a theh lut - a ban pahin pawi a la sawi zui!

Bartomeu hian European club lian hoin din an tum nia sawi European Super League chungchang a sawi a, Barca-in ESL an zawmna tura thutlukna a siam hman thu a sawi. 

Tebas chuan, "Bartomeu kha ka khawngaih takzet a ni. Barca-in ESL an zawm tur thu a sawi a, mahse tumahin an sawi zui lo. He inelna hi sum ang zawnga thlir pawhin kalpui tlak a ni lo," a ti a, a insum lo.