Vawiinah I League champion Minerva inlan dawn

NorthEast aṭanga I League champion hmasa ber Aizawl FC leh champion lai Minerva Punjab te chu vawiin tlai dar 2:00 hian Rajiv Gandhi Stadium, Mualpuiah an inkhel dawn.

Mizo club hian ni li chhungin inkhel pawimawh vawi thum an hmachhawn a, chuvangin ṭum dang zawng aiin Aizawl FC hian Mizo mipui ṭanpuina an mamawh lehzual ang.

Ball sem tur David
Aizawl FC-in I League match hnuhnung bera Neroca nen goal awm loa an inhnehtawk ṭumin bum semtu ṭha an nei lo a, an winger pahnih Albert Zohmingmawia leh Lalrinfela te chet ṭhat tawk loh chhanah midfield mawhpuh theih a ni. Ball sem tur bera ngaih Kyrgyzstani midfielder Bektur Talgat Uulu-a'n ball ṭha pek a harsat a, captain Alfred Kemah Jaryan-a'n ball fing pek a thiam bik loh avangin Gift Raikhan-a'n ngaihtuahna thar a sen a ṭul a, a thutlukna chu David Larinmuana chhawr a ni.

Gift chuan, "David-a thiam-naah hian rinhlelh tur a awm lo a, amaherawhchu minute 90 khel tlaka dah tur hian hun ka mamawh rei a ni. Tunah chuan inkhel tlak a ni tawh a, Minerva nen hian inkhel bul a ṭan dawn," tiin Zemabawk North tlangval chungchang a sawi. David hian Mohun Bagan nen an inhnehtawk ṭumin injury time-ah freekick mawi tak a khung a ni.

ONGC leh East Bengal player hlui David-a chuan, "Team boruak a ṭha a, Minerva hneh tur hian kan inringtawk. Kan mualah point hloh a thiang tawh lo a, kan chak ngei ngei a ngai a ni," tiin Vanglaini a hrilh.

Mizo team chu
Aizawl FC-in MPL semifinal an lut tawh a, tunah chuan rilru hahdam takin I League an khel dawn. Hei bakah hian Minerva nen a chhawr tur player-te chu Ningani zana Electric Veng an hneh ṭumin chawlhtir an ni .

AFC coach Gift Raikhan chuan, "MPL-a hnehna kan chang hian team chhung boruak a ti ṭha lehzual a. I League khelh a châkawm sawt. Electric Veng hnehtu player-te pawh a ṭul dan a zirin a chhawr theih a, player dinhmun kan hriat chian phawt erawh a ṭul dawn," tiin a sawi.

Mizo club hian match thum aṭangin goal thum an khung a, amaherawhchu match hnuhnung bera goal an khung loh avangin tlar hma insiamṭhat a ṭul a, a bik takin Liberian forward Ansumana Kromah-a'n ṭha zawka khelh a ṭul dawn. Kelkang tlangval Lalkhawpuimawia leh Ivorian winger Leonce Dodoz ten an thlawp ṭhat a ngai bawk ang.

Team thar Minerva
Minerva Punjab-in midfielder William Opoku an la kawl a, Ghanaian player hi English club Middlesbrough-ah te pawh lo awm tawh a nih avangin a thiam tih a chiang a, season liam ta khan Rajiv Gandhi Stadium-ah a ṭhat zia a rawn pholang tawh bawk.

Chutih rualin Minerva hian Aizawl FC-in nomawi an chawi zawha an player tam zawk an chan ang chiahin champion team zingah player pasarih vel bak an chelh lo a, team thar tia sawi theih a ni a, coach thar an nei bawk.

Team enkawltu Paul Munster hi champion puitu Khogen Singh aiin sulhnu a nei ṭha zawk a, Czech club ṭha Slavia Prague tan te pawh khel tawhin Canadian league sang bera Golden Boot pawh dawng tawh a ni.

Kum 36 mi Munster chuan, "Chak tum lo ni ila, Mizoramah kan rawn kal lo ang. Boruak awm dan hriat hma nan kan rawn thleng hma a, khelmual dinhmun pawh kan hria a, chhuanlam atan hman kan tum lo," tiin a inringtawk hle.

Minerva hian I League match hnihah goal an la khung lo a, point khat chiah an la hlawh chhuak bawk.

Minerva coaching staff zinga pakhat chuan Japanese forward Yu Kuboki inhliam an tawrh thu Vanglaini a hrilh a, head coach Munster erawin, "Football hi team game a ni a, player pakhat inhliam vang a ni lo. Match hnuhnung pahnihah goal kan khung lo a, Aizawl FC nen chuan a dang tawh ang," tiin goal nawr nat an tum thu a sawi.

Inkhel dang
Vawiin tlai dar 5:00 hian Barabati Stadium, Odisha-ah Indian Arrows-in Mohun Bagan an hmachhawn dawn a, Kolkata club lian Mariners hian chak an la nei lo a, vawi hnih khelh tawhah point hnih an hlawh chhuak.

Pathianni tlai dar 2:00 hian Real Kashmir-in NEROCA an mikhual ve bawk ang a, tlai dar 5:00-ah Gokulam Kerala-in Aizawl FC an hneh hnua vawi hnih chak tawh lo Shillong Lajong an mikhual bawk dawn.