Aizawl FC-in MPL semifinal lut

Mc Dowell's No. 1 Soda Mizoram Premier League Season 7-ah Aizawl FC-in Ningani zan khan Electric Veng 2-0 a hnehin semifinal an lut.

I League club hma hian champion lai Chhinga Veng chuan knockout stage an lut a, round hnih khelh turah hmun ruak pahnih a la awm dawn tihna a ni.

Aizawl FC tan K. Lalhmangaihkima leh F. Lalremsanga ten second half-ah goal an khung a, goal hnihna khungtu Lengpui tlangval Remsanga chu man of the match a thlan a ni.

Team dang daih

Aizawl FC-in Nilaini tlaiah I League match an nei a, Neroca nen goal awm loin an inhnehtawk. MPL match an khelh chhunzawm avangin coach Gift Raikhan chuan team a thlak hlawk tur thu a sawi a, Electric Veng FC nen player ngai a chhawr nawn lo.

Chutih rualin AFC hi an ṭha ta lo tihna a ni hauh lo - MPL hmasa palia best keeper ni thei Lalawmpuia a rawn inlan a, tlarhnungah season liam taa Chhinga Veng captain Lalrinchhana Tochhawngin hoin Lalhriatrenga, Joe Zoherliana leh Lalbiakzuala te an awm.

Midfield-ah season ṭan tirha rinrawl Paul Ramfangzauva leh Hmangaihkima te an awm a, mual sirah Isak Vanlalruatfela leh Rochharzela te awmin, tlarhmaah Fela Zote leh Remsanga te an awm a, ONGC captain hlui V. Lalchhuanawma te bench-ah a la dah thei. AFC tana thu lawmawm chu left back Lalramhmunmawia a dam tawh a, hun tawp hma hretin a rawn inlan ve bawk.

Electric Veng an kim bik lo a, captain Isak Vanlalpeka bakah C. Zonunmawia leh Vanlalhmangaiha te chu Chanmari nena red card an hmuh avangin an chhawr thei lo a, match pawimawhah an ṭhat dan berin an inlan thei bik lo.

I League club an dang

Aizawl FC 'B-Team' anga chhal theih ni mah se an khelh ṭhat lai emaw, coach azira rinrawl ni thei vek an nih avangin an la ṭha tawk - I League-a hnuhma nei tawh deuh vek an ni. Ṭan phat aṭangin an khel ṭha a, AFC-in crossbar an pet per nghal a, Fela Zote-in hnai tak aṭangin goal zawnah a tauh thei lo a, inkhel an thunun zawk.

Amaherawhchu Electric Vengin goal khung theihna hun ṭha an nei ṭha zawk a, Vanlalremsanga'n keeper AwP-a a tlan pelh hnuah a lak nat hret avangin goal-ah a chantir thei lo a, first half-ah goal a lut lo.

Second half minute 10-na lekah Hmangaihkima'n goal a khung a, Electric Veng player-in a lo dang pial lut a ni.

Hun tawpah erawh Remsanga thiamna a lang a, minute 87-naah EFC defender pahnih a bum hnuah a ke chhip lut a, I League club 2-0 a chak puiin semifinal a hruai thleng.

Electric Veng erawh Serchhip zin hnuah chak hmel an hmuh tawh loh avangin semifinal lut lo thei dinhmunah an ding - ṭan a ngai.

Footballer Sûnna

Aizawl FC leh Electric Veng FC inkhelh hma hian hranghlui footballer pahnih, tun hnaia cancer avanga boral ta F Lalchhandama (Papuia) leh PC Lalfamkima-te sunna leh hriatrengna hun hman a ni a; inkhelh banah an nupuite ve vein MPL inkhela lawmman sem ṭhinte an hlan a ni.