Uruguay hnehtu Brazil an chungnung

Brazil chuan Arthur leh Richarlison te goal hmangin Uruguay 2-0 in an hneh. Tite-a naute hian South American World Cup qualifier match li an khelh tawhah hnehna chang vekin hma an hruai.

Lionel Messi awmna Argen-tina pawhin Peru chu 2-0 in an hneh ve bawk, world champion vawi hnih ni tawh hi an match hnuhnung zawkah Paraguay nen an inhnehtawk a, point hnih an hloh tawh avangin pahnihnaah an awm.

Neymar awm loh karah pawh Brazil an talbuai duh lo, inkhel chawhma lamah goal hnih an khung theih avangin point thum hmuh an tan a harsa lo. Juventus midfielder Arthur leh Everton hmatawng Richarlison ten goal an khung bakah Gabriel Jesus chuan hun ṭha a hlah nual bawk.

Uruguay lamin coronavirus vangin striker Luis Suarez an chhawr thei bik lo. Tlarhma lama rinrawl Edinson Cavani chu minute 71-naah Richarlison a tih tluk vangin hnawhchhuah a ni a, world champion hmasa ber hian an mualah beisei an phak lo.

Brazil defender Thiago Silva chuan, "Player pawimawh ṭhenkhat tel lo chunga kan chak thei hi a lawmawm, chak chauh hi a tawk lo. Tlarhnung kan inremphui thei a, kan mamawh zat goal kan nei thei bawk hi a lawmawm lai chu a ni," a ti.

Nicolas Gonzalez leh Lautaro Martinez te goal hmangin Argentina an chak. Gonzalez-a'n minute 16-na lekah ram tana a goal hnihna a khung a, striker Martinez chuan Leandro Paredes hnen aṭanga a ball hmuh chu keeper a bum hnuah nuamsa takin a khung bawk.

Inkhel chawhnu lamah Messi a hmuhnawm, goal khung theihna hun ṭha erawh a hlah a, a ṭhiante tana a siamsak pawh a hlawhtling ta chiah lo. Barcelona captain hi Paraguay laka a goal khung chu pawmsak a ni tawh lo bawk a ni.

Messi chuan, "Point thum kan hmuh avangin kan hlim tlang hle. Hun ṭha tam tak kan insiam a, ṭhenkhat hlawhtling ta chiah lo mah se goal hnih neih hi a tawk hle. Match tin mai hian hmasawnna kan nei zel, hei hi a lawmawm lai chu a ni," a ti.

James Rodriguez goal khat khung chu Colombia mualpho hliah khuh nan a tawk zo lo. Ecuador lamin Robert Arboleda, Angel Mena, Michael Estrada, Xavier Arreaga, Gonzalo Plata leh Pervis Estupinan te hmanga an khung avangin khualmualah an mualpho hle.

Inkhel dangah Chile tan Arturo Vidal-a goal neih a tawk zo bik chuang lo. Inter Milan midfielder goal khung kar lakah hian Venezuela tan Salomon Rondon leh Luis Mago ten khungin hnehna an chang a, tun qualifier bika a vawi khat nan hnehna an chang.

South America aṭang hian ram 10 ten World Cup qualifying an khel a, an inkhelh kual vek hnuah a sang pali an tling nghal ang. Pangana chuan inter-confederation playoff an khel dawn bawk  a ni.