Police-in semifinal an hnaih

Mc Dowell's No. 1 Soda Mizoram Premier League Season 7-ah nimin khan Mizoram Police chuan Bethlehem Vengthlang 4-0 in an hneh a, pathumnaah inhlang chhoin semifinal lut turin an dinhmun an ṭha ta hle.

Police tan hian Lalfakzuala chuan goal hnih khungin man of the match-a thlan a ni a, Lalruatpuia leh Lalbiakhlua ten goal khat ve ve an khung bawk.

Police an kim

Police tan Ramhlun North an hmachhawn ṭuma hrem vanga khel thei lo Lalfakzuala a rawn let a, player ṭha dang Malsawmfela, R. Malsawmtluanga, H. Lalbiakthanga, Lalrinzuala Khiangte, Lalhmun-mawia, Lalruatpuia leh keeper F. Lalmuanawma ten inkhel bul an ṭan.

MPL7-a Police chi hnih kim leh kim loin an inlan ṭhin a, nimin hian an kim avangin chak tura rinkai an ni nghal.

A goal hma

Minute riatna lekah player ṭha danglamna a lang nghal a, Police midfielder MS-a ball fing chu Fakzuala'n um lutin goal-ah a chantir nghal.

Inkhelah erawh Police an chung-nung bik lo a, minute 33-naah Ruatpuia hmanga an goal hnihna an khung avangin an dinhmun a ṭha thung. North Vanlaiphai tlangval Ruatpuia hian Biaktea ball pek chu la thlain chiang zetin a pet lut.

Second half-ah Police-in goal hnih bawk an khung. Midfielder V. Lalṭanpuia ball vawrh luh chu Fakzuala'n um lutin cool zetin minute 52-naah a khung.

Winger tlan chak Biaktea volley luh mawi zet chu offside vangin pawm ni lo mah se minute 65-naah Fakzuala cross a tauh lut chiang hle.

Minute 25 dang an khelh belh leh a, goal erawh a luh belh tawh lo.

A la chiang lo

Mizoram Police coach Lalbiaksanga Colney chuan, "Semifinal dinhmun a la chiang lo a, theihtawp kan chhuah zel ang," tiin a sawi a, Police hi player kima an khelh zel tur thu a sawi bawk.

Bethlehem Vengthlang manager Lalropuia chuan, "Kan naupanna a lang leh ṭhin a ni," tiin tawnhriat an inneih tam hleih thu a sawi.