Liverpool an dam kim

Champions League-a Red Star Belgrade hneh lo hlim Liverpool-in chanchin lawmawm an nei ve leh ta a, hliam vanga hun engemaw chen chawl tawh Jordan Henderson, Naby Keita leh Joe Gomez te an dam kim.

Liverpool boss Jurgen Klopp chuan, "Player inhliamte an dam leh ta hi ka lawm hle a, team-a an rawn kir leh thei hi keini tan chuan a lawmawm takzet. Midfield bikah phei chuan Alex Oxlade-Chamberlain sawi tel loh chuan kan dam kim vek ṭum a ni hial a ni," tiin a phur hle.

Reds hian Premier League match 11 an khelh tawhah an la tlawm miah lo a, table-ah pathumna ni mekin goal difference-a an phak loh Chelsea leh point hniha an phak loh Manchester City te chu an chunga awm a ni.

Pathianni zan dar 5:30-ah league match khel turin table mawngphaha awm mek Fulham an mikhual dawn a, awlsam taka chak tura ngaih an ni.

Mahse, Jurgen Klopp erawh a fimkhur a, German coach chuan, "Team ṭha tak an ni a, League Cup-a Manchester City nena an inkhel kha in en chuan an khel ṭha hle tih in hmu thei ang. Football hmuhnawm tak an pho chhuak a, goal hmaah an la vanduai rih mai a ni.

"Kan tan chuan kan hmaa inchhawp hi chona phurawm leh hautak a ni a, kan fan-te hian Anfield-ah inkhel awlsam en an tum a nih chuan in lamah lo awm mai turin ka rawn duh a ni," a ti a, an match khelh tur lak serious a duh.