Chong Wei a inkhel leh dawn

Malaysian tlangval Lee Chong Wei chu a hnar cancer enkawl a ni a, world number 1 hlui hi beisei anga a dam chho zel a nih chuan thla leh aṭangin training a zawm leh thei tawh tura beisei a ni.

Chong Wei hian trai­ning a nei har lo mai thei a, chutih rualin tourna­ment khelh erawh a hman­hmawh lo. Nakkum March thlaa khelh tur All England Open chu a beisei hmasak a nih thu a sawi.

Kum 36 mi Chong Wei chuan, "Treatment ka la zo tawh a, hma pawh kan sawn hle. Tunah hian badminton ka la chawlh­san lo a, court chhunga rawn kir leh ngei ka duh a ni," tiin a sawi.

Olympic silver medal vawi thum dawng tawh chuan sawi zawmin, "2020 Tokyo Olympic Games khelh hi ka duhthu­sam a ni a, kan ram tana sulhnu ṭha hnut­chhiah hi ka chak hle a ni. Tuna ka hun tawn hi a harsa hle a, chutih rualin ka hmangaih badminton khelh leh hlan hi ka nghakhlel hle a ni," a ti.