Nomawi tel loa chawl tur Drogba?

Season tawp ruala foot­ball a chawlhsan tur thu sawitu Didier Drogba chuan a club Phoenix Rising tan a match hnuhnung ber anga chhal theihah hnehna a chang zo lo a, United Soccer League Cup final-ah Louisville City FC chu 1-0 in an hneh lo.

Drogba-a'n inkhelh a chawlhsan tawh tur thu a lo sawi tawh avangin a football career-a a season tawp berah nomawi a chawi dawn lo tihna a ni a, United Soccer League hi US-ah chuan second division club te inelna a ni.

Kum 40 mi Drogba hian Phoenix Rising-ah hian neitu nihna a nei tel bawk a, club neitu zinga mi Berke Bakay chuan Drogba chu football khaw­vela a hnathawh ropui tak avangin lawmthu a hrilh. Bakay chuan Drogba hi club neitu zinga mi a nih angin club enkawlna lamah a inhman chhunzawm tur thu a sawi.

Ivory Coast tan vawi 104 inlana goal 65 khung thei Drogba hian a career-a a hun tawn ropui bera chhal ngam chu Chelsea-ah hmangin Stamford Bridge-a a hun hmasa zawkah match 341 khelin goal 157 a khung sak a, Premier League (3) leh Champions League nomawi a chawipui.

2014-15 season khan Chelsea-ah kir lehin match 40-ah goal sarih a khung a, Premier League-ah a champion pui leh hram a ni. Blues aṭang hian USA lamah pemin Montreal Impact a zawm a, season hnih a khelh hnuah Phoenix hi zawmin tunah chuan club neitu zingah a tel ta a ni.