Mission Veng Vikings an tlawm nawn

Mizoram Super League boruak a nung chhunzawm a, champion tura rinkai pahnih inkhelah Khatla TBL chuan Mission Veng Vikings chu 87-76 in an hneh a, TBL hian an chak loh hnua an match hmasa berah hnehna an chan theih laiin Vikings erawh an tlawm zawn ta.

Ningani zan Hawla Indoor Stadium, Republic Vengthlanga inkhelah team pahnih an inkhel tawk hle a, quarter hnihna bika che fuh zawk Khatla TBL lamin a tawp thlengin a chungnung zawk dinhmun an luah theih phah. TBL tan hian point 22 a score bakah rebound vawi 14 la thei Veron Young chu player of the night atan thlan a ni.

H. Laldinsanga kaihhruaina hnuaia khel Khatla TBL hi an match hnuhnung zawkah chiang takin Zarkawt BCA lakah an tlawm a, basket nei hnem ringawt loin a venhim lamah hma an sawn a, Vikings aṭanga an lak Moses Zoremmawia chuan point thum chauh nei mah se a khel ṭha a, MVP ni tawh Vanlalmuana pawhin a theihna tak pholang lehin point 13 a score bakah ssist vawi li a nei bawk.

MSL vawi hnih champion tawh hian an match lehpek atan 13 November, Thawhlehni zanah kai thar BC Bethlehem an hmachhawn leh dawn a, tun hnaia an hmasawnna thlir chuan Mapuia naute hian harsa lutuk loin hnehna an chang thei tura ngaih a ni.

Tuikual South laka tlawm hlim Mission Veng Vikings-in thawhchhuah nghal an tum a, state pawn player Dijon Najee Farr bakah Lalhlunmawia leh Lalhmachhuana te chuan point 17 ṭheuh an nei, player pathum hian an thawhhlawk viau nain player dangin an thlawp ṭha tawk lo.

Ronald March thlak zo tura an ngaih Farr-a'n quarter hmasa berah point 10 ngawt nei thei mah se, quarter hnihna bikah point a nei miah lo a, quarter hnuhnung pahnihah point sarih chauh a nei thei - inkhel boruak thlang danglam hlawk thei tur khawp chuan a la che na tawk lo niin a lang.

MSL-3 champion hian 13 November, Thawhlehni tlaiah champion lai Zarkawt BCA an hmachhawn leh dawn, season kal laia che ṭha bera chhal ngam BCA laka an tlawm nawn leh a nih chuan semifinal lut tur pawhin an hmabak a hautak tawh hle dawn a ni.