Manchester Derby: A hun a thleng leh ta

English football-a derby ngaihven hlawh bera chhal ngam chu Manchester City leh Manchester United inkhel a ni a, Pathianni zan dar 10:00-ah team pahnih an intawng dawn.

City boss Pep Guardiola hi attacking football mawi tak a phochhuah chu hmingṭhatpui ṭhintu a ni a, United boss Jose Mourinho hi defensive game hming

ṭhatpuitu a ni thung, zaninah an thiamna hlawhtlinpui an tum ve ve ang.

Manchester United-in English football-ah ro an rel ṭhin a, City tan elphak rual an ni lo. Mahse, tun hnaiah City-in Arab sum nena ṭangkawpin United an el pha tawh a, tun dinhmuna chak tura rinkai zawk chu City an ni.

Man City-in table chung ber luah mekin match 11-ah chak loh an la nei lo a, United erawh vawi thum tlawm leh der tawhin pasarihna an ni mek - an dinhmun a inthlau rih hle.

Champion vs 4

Manchester City-in table chung ber an luah miau a, an fan-ten champion loh chu an sawi ri thei tawh meuh lo - mahse anmahni ang thoa chak loh la nei lo Liverpool leh Chelsea an awm ve tho a, pressure nei lo an ni lo.

City-in season tawp thlenga hmahruaitu nih an thlir laiin Jose Mourinho thlir tlin tawk erawh top four a ni rih. Portuguese manager hian champion sawi ri tur chuan a sang pali zinga awm phawt an mamawh thu a sawi a, an hna hmasa tur chu City

hneh a ni.

Thil lang chiang tak erawh City hneh hi thil awlsam a ni dawn lo. Pep-a naute hian league match 11-ah goal 33 ngawt an khung thei a, an lama goal lut chu goal li chauh a ni.

United erawhin goal 19 chiah an la khung a, an lamah goal 18 a lut tawh bawk. An tlarhnung a pawp a, an tlarhma an hriam tawk lo. Tuna an dinhmun aṭanga thlir chuan City meuh hneh tur chuan rin an harsa a, mahse United an nih miau avangin chak lo tura dah ngawt erawh a thiang si lo.

A hunah tak...

Manchester United ṭantute lawm em emna tur chu a hunah tak result ṭha an nei hi a ni. City an hmachhawn hma chiaha Juventus hmachhawn an ngaih avang khan United fixture chu a 'hautak' tia sawi a ni a, mahse tunah chuan fixture hautak pakhat an vai kiang ta phawt.

Tun season inelna hrang hranga la tlawm miah lo Juventus chu khualmualah lehnghal 2-1 in an hneh a, Italian champion an hneh theih avangin an inringtawk sawt ang tih a chiang a, fan-ten beiseina an nei sang sawt bawk ang.

Tunah chuan City tum hmaa 'fixture hlauhawm' kha inrintawkna petu a ni a, City-in a hma ai chuan United an la 'serious' sawt bawk ang - Juventus hneh theitu an ni tlat!

Manchester City hian Champions League-ah Shakhtar Donetsk chu 6-0 in an sawp thung a, Ukrainian club hma chiah hian Southampton lakah goal ruk ngawt an khung bawk. United lamah goal tam tak khung an tum ang.

Lukaku a dam

United tana chanchin lawmawm chu Romelu Lukaku a dam tawh hi a ni. Belgian striker hian hliam vangin an match hnuhnung pahnih a khel lo a, Jose Mourinho chuan, "A inpeih tawh," tiin a striker chungchang hi a sawi.

City tan Sergio Aguero chu inlan ngei tura beisei a ni a, Argentine striker hi Pep-a'n derby thlirlawk chungin Shakhtar lakah bench-ah a dah a, harhvang takin United a mikhual thei dawn.

Kum 30 mi striker hi tun season-a Premier League match an khelh tawh zawng zawngah a la inlan kim vek a, match 11-ah goal sarih a khung thei. Inelna hrang hrangah match 14 khel tawhin goal 10 a khung.

City-in Aguero chauh lo pawh goal khung thei an kawl nual - Raheem Sterling chuan match 14-ah goal sarih a khung tawh a, goal nga khung tawh Bernardo Silva leh Gabriel Jesus bakah goal ruk khung tawh Riyad Mahrez leh David Silva an la kawl cheu bawk.

Inkhel hlu bik

United boss Jose Mourinho chuan, "Manchester derby a nih avangin inkhel danglam bik a ni a, a hlut dan hi sawifiah chi a ni lo," tiin an inkhel hlutna a sawi.

Portuguese manager chuan sawi zawmin, "Away game harsa tak Chelsea leh Juventus lakah kan khel tawh a, result ṭha tak kan hlawh chhuak.

"Result ṭha nei lo pawh ni ila derby hi chu a danglam bik ṭhin a, chak duhna thinlung kan pu ṭhin," tiin City lakah chak ngei an tum tur thu a sawi.