Dominic Thiem lakah Nadal chak lo

ATP Finals 2020 khelh laiah Rafael Nadal chu Dominic Thiem lakah 7-6 (9-7), 7-6 (7-4) in a chak lo, Spanish tlangval Nadal tan semifinal lut turin kawng a hautak phah dawn.

Thawhlehni zan inkhel dangah champion lai Stefanos Tsitsipas chuan Andrey Rublev chu 6-1, 4-6, 7-6 (8-6) in a hneh ve bawk. Group London 2020 aṭangin Thiem a tlang tawh a, hmun ruak pakhat a la awm.

Zanin dar 1:30 hian Nadal leh Tsitsipas ten an group match hnuhnung ber an khel dawn, a chak zawkin semifinal an lut ang. Match hnih a khelh aṭanga chak la nei lo Rublev tan erawh knockout round beiseina a tawp.

O2 Arena a inkhelah player pahnih an inkhel tawk takzet, service pawh vawi hnih an inchhuhsak ve ve. Nadal-a'n a tawnhriat neih tawh hmangin tie break lak theih a beisei a, mahse Austrian tlangval a vannei ta zawk.

Thiem hian tun hmain Nadal a ngam ngai meuh lo, inelna lian French Open final-ah pawh vawi hnih a hneh lo tawh. US Open nomawi a chawi hnuah erawh inrintawkna a ngah tih a lang a, boruak sang tak karah pawh chak turin theihna a nei tih a fiah.

Kum 27 mi Thiem chuan, "Point hmasa ber aṭanga a hnuhnung ber thleng khan a hlu em em vek. A bik takin set khatna tie break khelh lai khan 5-2 in ka hniam hman, khami hnua set lak kha chu vanneih vang a ni," a ti.

Season hmasa khan a thiam pariat zingah Tsitsipas a chungnung ber, kuminah erawh a match hmasa berah Thiem a ngam lo. Match hnihnaa Rublev a hneh vang erawh chuan beiseina a la nei, world number 2 Nadal nen tlang tur zawk an chingfel dawn.

Kum 22 mi Tsitsipas chuan, "Ka khel ṭha a, ani pawh a khel ṭha hle. Player pahnihin inkhel hmuhnawm leh ropui tak kan chawp chhuah zana vannei zawk ka ni hi ka lawm," tiin a sawi.

Group Tokyo 1970 lamah Novak Djokovic leh Daniil Medvedev ten vawi khat ve ve hnehna an chang tawh a, Alexander Zverev leh Diego Schwartzman te an la chak ve lo thung. Nizan khan an group match pahnihna an khel a, result kan hre hman lo.