Liverpool: Hliam leh buaina, doral a lo lian e!

Pathianni zan dar 12:45-ah Liverpool-in Premier League hmahruaitu Leicester City an mikhual dawn a, mahse Liverpool damdawi in erawh a lun rih hle.

Liverpool tan 'international break' chu 'hmelma' ang mai a ni a, an player-te chanchin an hriat chu chanchin lawmawm loh hlir a ni. 

Reds thiampuipa Mohamed Salah chu Egypt tana a fehchhuahnaah Covid-19 a kai a, club captain Jordan Henderson chu England-in Iceland an hmachhawn tur squad aṭangin hliam vangin a inhnukdawk bawk. 

Andrew Robertson chu hliam vangin Scotland tan international break-ah a inlan kim thei lo a, Trent Alexander-Arnold chu England squad aṭangin inhnuhdawh a ngai a, Virgil van Dijk leh Joe Gomez chu season tluan deuhthaw an chawlh a ngai dawn. 

Premier League match riat khelh tawhah Liverpool hi pathumna an ni mek a, hmahruaitu Leicester an phak lohna erawh point khat chiah a ni - hei hian Pathianni zan an inkhel tur pawimawhzia a hrilhfiah.

Hetihlaia, chiang taka Liverpool hmel entu chu 'inhliam' a ni a, coach ṭha Jurgen Klopp-a tan meuh pawh mangan lohna chi a ni lo. October 17-a Van Dijk a inhliam hnuah Dutch defender a lo kir leh tawh lo a, tun season tluan deuhthaw a inlan lo ang. 

Liverpool tana VVD pawimawh-zia hrilh nawn kan ngai lo a, Reds-in thaw dep depa Gomez leh Joel Matip an thlir laiin England tana a fehchhuahnaah Gomez-a inhliam a, VVD hnungzuiin tun season tluan deuhthaw a inlan thei dawn lo. 

Alexander-Arnold-a'n a chawn hliam vangin England squad a zawm thei lo a, Robertson-a'n a malpuiah hliam a nei bawk - defender pahnih hi he thu buatsaih thleng hian an lo kir hun tur puan zar a la ni lo thung. 

VVD-a'n season hmasa khan league-ah minute 3,420 khelin Reds tan minute zawng zawng a khel kim vek a, Alexander-Arnold (3,176) leh Robertson (3,113)-te minute khelh zat enin Reds tana an ṭangkaizia a lang bawk. 

Gomez hian season hmasa khan league match 38-ah match 22 chauh bul ṭan mah se tun season-ah first choice a ni leh tawh. VVD hian vawi 2902 pass dik neiin season hmasa Premier League-ah ani aia pass dik nei ngah an awm lo a, ball kang chan hnemah Burnley defender James Tarkowski chiah a tluk lo bawk. 

Arnold (13 assists) leh Robertson (12)-ten season hmasa league assist ngah lama an phak loh awmchhun chu Manchester City playmaker Kevin de Bruyne chiah a ni a, fullback pahnih awm lo hi tlarhnungah mai ni lo goal hmaah Liverpool-in an buai phah dawn. 

Liverpool tlarhnung hi tun season-ah an talbuai hrim hrim - goal chhuah loh vawi khat chiah an la nei a, goal 16 chhuah tawhin anni aia goal chhuah hnem chu goal 17 ve ve chhuah tawh Leeds United leh West Brom chiah an ni. 

Liverpool centre back-ah Joel Matip chu dam chiang awmchhun a ni a, Cameroon international hi hliam vanga talbuai ngun tak a nih avangin kar khata match thum khel tura rin a harsa. 

Kum 23 mi Nat Phillips-a'n league match a khelh chhunah West Ham hmachhawnin a rintlak viau a, mahse European football khel tur squad-ah telh a nih loh avangin Champions League erawh a khel thei lo. 

Kum 19 mi Rhys Williams hian tun season-ah match nga khel tawhin buaina a la nei lo a, mahse season hmasa lawka English sixth division club Kidderminster tana khel a nih avangin rin ngam harsa tak erawh a ni tho. Klopp-a'n tlarhnungah midfielder Georginio Wijnaldum hman chang a nei a, game hautak erawh a ni ngai lo. 

Defender thar Kostas Tsimikas dam tawh mah se Premier League match la khel miah lo a ni a, James Milner hi duhna hmuna chhawr theih a ni bawk. Hetihlai hian tlarhnunga chhawr theih Fabinho chuan dam lam a pan a, hei hian Anfield boruak rit zual pui chu a chhawk zangkhai ang. 

Season hmasaa Manchester City tihsual lian tak chu Vincent Kompany-a chhuah hnua a hmun ruak luah tur an lalut lo kha a ni a, Klopp-a'n Dejan Lovren a chhuahtir hnuah a hmun ruak luah tur a lalut lo. 

Hetiang boruak thlir hian Reds-in January-ah defender an lalut mai ang em, tih chu zawhna awm a ni. Kum 21 mi RB Leipzig defender Dayot Upamecano hming a ri a, mahse pound maktaduai 40-a chhuak thei nia sawi defender hi Champions League-a Manchester United-in 5-0 a Leipzig an sawp ṭumin Marcus Rashford-a'n duhthalin a ching phar tawh.

Napoli defender Kalidou Koulibaly hming a ri reng a, season hmasa khan Reds-in Brighton defender Ben White rim mah se tun hnaiah midfield-ah a khel a, Liverpool defender hlui Conor Coady hming sawi rik a ni bawk. 

Liverpool academy chhuak hi Wolverhampton Wanderers tan defender pawimawh a ni a, season hmasa khan league-ah minute zawng zawng a khel kim vek. Reds legend Jamie Carragher chuan a club hlui chu Coady lalut turin fiamthu titakin a rawn a, England team-a hmun chang chho defender hian Anfield-a kir a hreh lo ang.