Beisei phak lo Aizawl FC an tlawm

North East aṭanga I League champion hmasa ber ni thei Aizawl FC-in tun season league match li an khelh tawhah chak hmel an la hmu lo - Inrinni khan Minerva Punjab an mikhual a, 1-2 in an tlawm.

Minerva coach Paul Munster-a'n Aizawl FC an hmachhawn hmain, "Point thum hmuh tum lo ila he hmun hi kan rawn pan lo ang," tiin inring tawk takin Vanglaini a hrilh a, a tum ang ngeiin point thum nen an haw.

Punjab club tan Ivorian defender Lancine Toure chuan goal hnih a khung a, Mizo club tan Leonce Dodoz chuan penalty hmangin si phurh sut ṭhen mah se goal dang an khung theih loh avangin Mizo club an tlawm.

RG Stadium-a inkhelh zawhah AFC coach Gift Raikhan chuan, "Tunah chuan ka rilru hi a buai zo tawh a ni," tiin a sawi a, ngaihtuahna sen ṭhat a mamawh thu a pha lo.

Goal lut hma buaina
Aizawl FC-in an match hmasa pathumah Shillong Lajong, Mohun Bagan leh Neroca hmachhawnin point hnih chauh an hlawh chhuak a, Minerva lakah chuan point thum hlawh chhuak thei tura beisei an ni.

Season hmasa I League best coach hian inkhelh hma pawhin Minerva chu point thum an hmuh theihna tur a nih thu a sawi a, mahse coach sawi angin a naute an khel chhuak lo.

Minute 10-na lekah Aizawl FC-in goal an chhuah nghal a, Middlesbrough midfielder hlui William Opoku-a corner pet chu vengtu nei lo defender pasang Toure chuan goal-ah a chantir a, AFC defender ten an tih tur an ti lo.

Mizo club-in hma taka goal an chhuah avangin na taka nawr let tura beisei an ni a, mahse beisei angin an khel chhuak lo a, Minerva zawk an hlauhawm chhunzawm.

Minerva bawk
RG Stadium-a fans pungkhawm ten auna tur an duh a, mahse AFC player-ten fans hlimna tur an thlen thei lo - goal khung an harsat a ni mai lo a, Minerva tlarhnung an chhaih buai meuh lo.

Minute 58-naah Minerva bawkin goal an khung a, goal khungtu pawh tudang ni loin Toure bawk a ni. Minerva hian an foreigner neihte 'lenna' leh tharum ngah chhawr ṭangkai turin ruahmanna an siam a, an tisual lo tih a lang.

Aizawl FC-in Lalrinfela an luhtir hnuah an goal nawr a na sawt a, awmze neiin chance erawh an insiam thei chuang lo. Hun tawp nan minute ruk chiah a awm tawh tihah handball vangin penalty an hlawh chhuak a, Leonce Dodoz chuan goal-ah a chantir.

Mizo club-in goal an khung hnuah an phur sawt a, goal dang erawh an hlawh chhuak thei chuang lo. Minerva an chak a, Aizawl FC erawhin chak an la nei lo.

Beisei phak lo
Aizawl FC-in minute 90 chhungin beisei an phak lo a, player-ten inrintawkna an nei lo. Ball pass sual a tam a, midfield-ah 'awl' a tam a, tlarhnung lam a phui tawk lo bawk.

Gift chuan, "Kan ṭhat tawk lohna in sawi zawng zawng hi ka pawm. A tir lamah khan 4-1-2-3 hman ka tum a, mahse kan hlawhtlinpui lo. Kan formation thlak danglam ka tum kha chuan kan tlai hret tawh a ni," a ti.

AFC player-te khelmual chhungah an au tam tawk lo a, hei vang hian awlsam taka ball inpek mai tur nia lang tam takah an talbuai. Gift chuan hei hi an chinfel vat tur thu a sawi.

Manipur coach chuan, "Khelmualah ka naute an au tam tawk lo a, field chhunga in man tur chuan player-te an in koh hnem a ngai a, hei hi kan inzir zelna tur pakhat a ni," a ti.

Foreigner ṭha lo?
Kyrgyzstani midfielder Bektur Talgat-a'n beisei a phak lo chhunzawm zel a, first half-ah lakchhuah a ni hial. Gift chuan, "Bektur hian a theihna angin a la khel chhuak lo a, hliamin a tibuai ve bawk nen a la talbuai deuh a ni," a ti.

Bektur chauh a ni lo - Kareem Nurain-a'n tlarhnungah beisei a phak lo a, Dodoz hi club dang foreigner nena khaikhin chuan a 'tenau' hret a, Alfred Jaryan a che rang tawk lo a, Ansumana Kromah-a'n chawmtu a la nei ṭha tawk lo.

Gift chuan, "Ka player-te an ni a, coach ka nih angin ka neih ang hman thiam hi ka tih tur a ni. Mahse, club dang foreigner nena khaikhin chuan kan nei ṭha tawk lo tih hi ka pawm," a ti.

Club dang chakna hi foreigner an ni tlangpui a, Aizawl FC foreigner-te tualchhung player aiin an ṭhat bikna hmuh tur a vang hle.

Fixtures hautak
Aizawl FC hian November 16-ah Chennai City chu I League-ah an mikhual ang a, November 24-ah East Bengal an mikhual leh bawk ang.

Hei hi hriat tel a ṭha bawk, I League club hian MPL-ah Mizoram Police (Nov 13), Chanmari FC (Nov 17) leh Chhinga Veng (Nov 19) an hmachhawn dawn bawk - I League-a khelte erawh MPL-ah hian an inlan tawh meuh lo.

Gift chuan, "Albert Zohmingmawia'n match thum a zawna a khelh avangin Minerva lakah ka chhawr ngam lo a, Chennai lakah chuan Lalrinfela nen bul an ṭan tawh ang. Insiamṭha turin theihtawp kan chhuah dawn a, a sang thei ang bera season khar kan duh a ni," a ti a, a beisei a la bo lo.

Minerva coach Paul Munster chuan, "Hma takah goal kan khung avangin kan thuhnuaiah game kan dah thei a, kan chak phah a ni," a ti.