Tottenham-in Zaha tel lohna Palace hneh

Totttenham Hotspur-in Inrinni zan khan Selhurst Park-ah Crystal Palace chu defender Juan Foyth a tauh luh hmangin 1-0 in an hneh.

Palace-in an inghahna Wilfried Zaha chu malpui hliam vangin an chhawr thei lo a, kum 26 mi tel loa match 13 an khelhah an chak lo vek. Ivory Coast international hian tun season-a Palace goal riatah goal thum khungin assist vawi hnih a nei a, a awm lo hi an tuar tih a lang chiang hle.

Chutihrualin he inkhel hian stadium thar sak vanga buai Tottenham an tlo tih a pholang a, an squad a chhah tawk loh avangin champion tur em chuan rinawm lo mah se Champions League an khelh phak erawh a beiseiawm hle.

Spurs tana goal khungtu kum 20 mi Foyth hian English club tana a khelh hmasak berah Wolverhampton hmachhawnin penalty vawi hnih a chawi a, 3-2 in an chak tho. Tun ṭumah erawh Argentine defender hi goal awmchhun khungtu a ni a, coach Mauricio Pochettino pawhin a fak hle.

Tottenham coach Pochettino chuan, "Hmasawn dawn chuan tihsual neih a ngai a, kar liam ta kha chuan penalty a chawi avangin hrehawm a ti hle. Tunah erawh ṭha takin a khel a, Europe-a defender ṭha ber ni thei turin theihna a nei a ni," tiin a sawi.

Inkhel dangah Leicester City-in club neitu Vichai Srivaddhanaprabha chetsual hnuah a vawi khat nan an mual King Power Stadium-ah an inaln a, Burnley nen goal awm loin an inhnehtawk.

November 10, Inrinni
Cardiff City 2 - 1 Brighton & Hove
Huddersfield Town 1 - 1 West Ham United
Leicester City 0 - 0 Burnley
Newcastle United 2 - 1 AFC Bournemouth
Southampton 1 - 1 Watford
Crystal Palace 0 - 1 Tottenham Hotspur