Bayern lakah Dortmund an chak

Bundesliga hmahruaitu Borussia Dortmund chuan vawi hnih ngawt an si phurh an sut hnuah Bayern Munich an hneh. German champion Bayern hi Signal Iduna Park-a goal nga luhna inkhelah 3-2 in an tlawm.

Tun hnai season ruk chhunga league nomawi chawi vek thei Bayern Munich hian manager thar Nicko Kovac kaihhruaina hnuaiah beisei an phak lo a, league match 11 khelh tawh chin­ah hmahruaitu Dortmund hi point sarih zetin an phak ta lo; nomawi humhim tur chuan in­siam­­ṭhat an mamawh tawh takzet.

Goal nga chu

Robert Lewandowski-a'n minute 26-naah six-yard box hrul aṭangin goal hmahruai a tauh lut a, second half ṭan tirah Marco Reus chuan penalty aṭangin a sut. Germany international forward hi box chhungah Bayern keeper Manuel Neuer-a'n a tih tluk vangin penalty a chawi a, ama hlawhchhuah a khung nghal a ni.

Dortmund lam an lawm rei lo, goal an khung aṭanga minute thum hnu lekah Lewandowski bawkin a khung leh. Poland international hian a club hlui lakah zahngaihna a lantir lo hle. Mahse, tun hnaia khel ṭha tak Reus leh Paco Alcacer ten Dortmund tan goal khung lehin an mualah hnehna an chang.

Hun tawp hma deuh, minute 94-ah Lewandowski bawkin goal a khung leh a, Bundesliga top scorer hian an si phurh a sut zo emaw tiin lawm hman viau mah se offside vangin pawm sak a ni lo - kualmualah champion lai an tlawm.

Dortmund an hlim

Bayern Munich hi tun hnaia German football roreltu an ni satliah lo a, anmahni elphak leh cho phak an awm meuh loa ngaih a ni. An elpui club lian dang, a bik takin Dortmund aṭang ngei pawhin an player neih ṭhat an chhuhsak deuh zel thei a ni.

Club pahnihte an intawn hnuhnung chu March thla kha a ni a, Allianz Arena-ah 6-0 in Dortmund an tlawm; striker Lewandowski chuan hattrick a siam a ni. Tunah erawh thil a danglam ta, Lucien Favre-a naute hian 2012 hnua a vawi khat nan league match bikah Bayern an hneh leh ta.

Kum 61 mi Favre chuan, "Tunah hian hmahruaitu chu kan ni ngei mai. An hnungah Gladbach awmin pathumna chu Bayern an ni leh nghal. Inelna hi a bul kan ṭan dawn chauh a ni a, keini hi champion chiang anga sawi theih ngawt chu kan la ni lo," tiin a sawi.

Dortmund tana goal hnih khungtu Reus chuan, "Second half-ah khan min nawr na em em a, kan tan chuan dawl zawh kha thil harsa tak a ni. Mahse, keni hian team nghet tak kan din tawh a, inrintawkna kan ngah avangin kan chiai duh bik lo. Kan team hi mimal ṭha bik leh thawhhlawk kan awm lo, mimal tin thawhrimna leh inpumkhatna vang chauh a ni," a ti.

Sancho a hmuhnawm

European foot­ball ang zawnga chhut pawhin Bayern Munich leh Dortmund inkhel hi a boruak a lian a, goal hnih khungtu Reus chu mitin fak leh sawi hlawh a ni ngei mai; chutihrualin a phena mi ṭangkai sawi hmaih theih loh a awm - a hming chu Jadon Sancho a ni.

English rawlthar duhawm hian Bayern lakah player pui­tling a nihzia a lantir, a chet ranna hmangin Bayern tlarhnung a chhaih buai thei hle. Goal an phurh vawi hnihnaah kum 18 mi Sancho thawhrah hmangṭangkaitu Reus-a goal khung tur chu line aṭangin an petchhuah sak.

Manchester City forward hlui lakah a chet dan mawi lo vangin Franck Ribery chu yellow card pek a ni a, a hnuah France international ball ken lai chhuhsakin, a hmaa awm Alcacer-a'n goal a khung theih nana bul ṭantu pawimawh a ni.

Bundesliga season kal laiah goal li a khung bakah assist vawi ruk a nei tawh a, ani aia ṭhiante goal khung tur siamsak hnem an awm lo - kum 18 mi chauh a la ni tih theihnghilh loh a ṭha ang.

England international Sancho chuan, "Kan team khelh danah ka lawm hle, kan zavaia thawhrimna vang a ni. Bayern laka hnehna kan chan kan lawm a, season tawpah chuan champion vangin kan lawm ngei ka beisei," a ti. Dortmund hian league match 11 an khelh tawhah chak loh an la nei lo.