Chawnpui daltu Chhinga Veng

Mc Dowell's No. 1 Soda Mizoram Premier League Season 7-ah champion lai Chhinga Vengin semifinal lut tawh mah se league round-a pakhatna dinhmun hauh tumin inelna an la thu tak. Zirtawpni zan khan Lalsangzuala Hmar hoten Chawnpui FC 3-1 in an hneh a, MPL kaithar semifinal kalkawng an sawr zim sak.

Lammual inkhel hmuhnawm takah hian Chawnpui defender Lalruatfela leh Chhingcows defender K. Lalmalsawma te chu first half-ah hnawhchhuah an ni a, second half-ah goal a lut chauh. Chhinga Veng tan Jacob Lalrawngbawla, K. Lalthlahlova (Patea) leh Gatch Diomande ten an khung a, Chawnpui tan Lalhlimpuia'n a khung ve bawk.

A pawimawh dan

Chawnpui FC tan round 12 inkhel hi a sang palia awm theihna hun ṭha a ni a, semifinal khel thei china awm turin chak a ngai a, point khat chauh pawh hmu se panganaa an awm thei bawk.

Chhinga Veng erawh an hnuai chiaha awm Aizawl FC-in an hnaih tak avangin pakhatna dinhmun sawhnghet turin chak an mamawh a, semifinal-ah league round pakhatna hian palina an hmachhawn dawn avangin final kawng awlsam zawk zawh theihna a ni a, inthlahdah a la thiang lo.

Danglamna red card

Chawnpuiin an point mamawhna hrechungin an khel a, point thum neih tuma an khelh avangin Chhinga Veng tan khelh an harsa. Chutihrualin boruak sanga tawnhriat nei tawh Jacob-a thiamna lang a, Shillong Lajong midfielder hlui hi freekick hmangin a hlauhawm thei hle.

Inkhel danglamna tak erawh red card-ah a ngaih theih. First half tawp hmain Malsawma tlu tho chu Ruatfela'n ball-in a pet per a, Chhinga Veng defender hian thungrul ve nghalin buaina tenau a chhuak. Referee Lalthangliana'n thil thlen dan thlirin red card pakhat ve ve pein buaina a ching fel a, player 10 ve vein an khelh zui a ṭul ta bawk.

Chawnpuiin an defender pawi-mawh Ruatfela an chan a, player pakhat ve ve a an tlem tak avangin Chhinga Veng tan ball pekna tur hmun a zau sawt a, team a ṭha zawk ṭhatna a lang. Jacob-a'n minute 57-naah freekick aṭangin a khung a, inkhel an thunun zawk bawk avangin awlsam taka chak tura ngaih an ni.

Mahse, minute 79-naah Chawnpui midfielder Vanlalthanga freekick mawi tak chu Hlima'n a tauh lut a, 1-1 a ni. Hun tawp thlengin inkhel a nun phah a, minute 85-naah substitute Hmingthanmawia freekick chu Chhingcows defender Patea'n a tauh lut a. Injury time-ah Dawngtea a ball fing zet chu Gatch-a'n um lutin keeper a pet khum a, 3-1 in inkhel a tawp. Chhinga Vengin chak phu zawk mah se goal an khung tlai avangin champion lai hi awlsam takin an chak lo a, an vannei.

Semifinal lut tur?

Chhinga Veng leh Aizawl FC-in semifinal an lut tawh a, team pahnih hi an la inhmachhawn dawn avangin hmahruaitu tur hi la chiang lo. Hmunruak dang pahnih hi Mizoram Police, Electric Veng FC, Chanmari FC leh Chawnpui FC ten an inchuh dawn a, chhiarkawp dan thlapin Ramhlun North leh Bethlehem Vengthlang ten beisei tur an nei tawh lo.

Round 13-ah Electric Veng leh Chawnpui an inkhel dawn a, an intawn hmasak zawk ṭumin an inhnehtawk. Chawnpui hi an chak zo lo a nih chuan semifinal beiseina a tawp ang. Chanmari erawh table mawngphaha awm Bethlehem Vengtlang an hmachhawn dawn a, round tawp ber thlengin Chawngthansanga hoten semifinal beiseina an neih a rinawm.

He round-ah vek hian Mizoram Police leh Aizawl FC te an inkhel dawn a, Lalbiaksanga hote hian round hnuhnung berah Electric Veng an la hmachhawn dawn bawk. Police hi an kim a nih chuan player thlirin semifinal lut tura ngaih an ni a, amaherawhchu fixtures thlir chuan knockout stage an thleng lo a nih pawhin an mak lo ang.