Mizoram Police leh semifinal inkarah Aizawl FC
Mc Dowell's No. 1 Soda Mizoram Premier League Season 7-ah Mizoram Police-in vawiin tlai dar 2:30 a Aizawl FC an hneh a nih chuan semifinal-ah an lut dawn. I League club leh tualchhung team ṭha inkhel hi a hmuhnawm ang.
A khuh hawnna
Football tihmuhnawmtu pakhat chu a chhehvela thil thleng hi a ni a, Mizoram Police hi pathumnaa an awm mek chungin champion tura rinkai ber tia chhaltu an awm a nih chuan tualchhung football a hre ve hle tihna a ni ang.
Aizawl FC erawh Minerva Punjab lakah dawl zawrin an zawr a, goal khat lekin chak lo mah se point hmuh an phu lo hrim hrimin tiin a sawi theih a. I League club tan MPL hi mualphona hliah khuhna ṭha tak a ni a, chutihrualin mualpho belhchhah theihna a ni bawk.
Police 'Kim'
Mizoram Police 'kim' tih ṭawngkam a awm chhan chu kim loa an khelh ṭhin vang a ni a, tun thlenga semifinal ticket an la neih loh chhan pawh kim loa an khelh rei vang a ni.
Tunah erawh an player lakluh tharte an chhawr thei tawh a, match hnuhnung bera Bethlehem Vengthlang 4-0 a an sawp hnuin training an zawm chhunzawm bawk a, Aizawl FC hmachhawn tur team hi Police 'kim' an tih chu a ni.
Goalkeeper F. Lalmuanawma hi MPL best keeper nilai a ni a, man of the match-ah vawi thum ngawt thlan a nih tawh avangin a ṭangkai tih a lang chiang. BVT nena an inkhelh ṭumin tlarhnungah Lalrinzuala Khiangte, Lalhmunmawia, Lalruatpuia leh B. Zoramthanga te bul an ṭantir thei a, bench aṭangin Ronald Zothanzama a lut bawk a, an ṭha thawkhat viau niin lang mah se hei hi position hrang hranga an chhiatna ber a la ni zawk.
Midfield laia tun hnaia Mizo zinga box to box midfielder ṭha ber zinga mi H. Lalbiakthanga, best player ni lai leh ball fing pe ṭhin R. Malsawmtluanga leh midfielder rorum V. Lalṭanpuia te an rem thei a. Tlarhmaah MPL5 best player leh best forward Malsawmfela, MPL6 top scorer Lalfakzuala leh MPL2 & MPL3 top scorer Lalbiakhlua te an dah thei a, bench-ah MPL4-a mimal lawmman pathum ngawt huitu F. Lalrinpuia a la awm bawk a, I League club-in la thei se lakluh atana an awh ṭhiau tur tia sawi theih vek an ni.
I League club hi...
Aizawl FC hian Gift Raikhan-a hnuaiah season ṭha ber an hmang lo a, I League club ni mah se MFA Super Cup leh I Day Football-ah an champion zo lo. MPL-ah pawh a ṭha ber an ni phak lo a, tun thlengin an ṭhat dan ber an la hre fuh thei lo.
I League best coach ni lai Gift hian an ṭhat dan ber nia a hriatin round hmasa pariatah player a rem a, point 13 hmuin table-ah pathumnaah an awm. Aizawl FC-in I League an khelh a ṭul avangin an squad chhah ṭha tak chu team hnihin an ṭhen a, 'B Team' tia chhal theih zawk chuan MPL match thumah hnehna chang vekin semifinal-ah an inpet tling.
Aizawl FC hian Zirtawpniah Chennai City (I League) an mikhual dawn a, Inrinniah Chanmari FC (MPL) leh Thawh-ṭanniah Chhinga Veng (MPL) an tum dawn avangin 'B Team' tia chhal player-te bawkin Police an hmachhawn ang.
Engtin zel?
Aizawl FC coach Gift Raikhan chuan, "Foreigner chhawr ka tum lo a, MPL ka ngaih pawimawh loh vang a ni lo. He inelna hi champion ngei kan tum a, tunah chuan semifinal kan thlen tawh avangin squad a siksawi ngam a ni. Police lakah hian chak kan duh a, heta khel ṭha tan hian I League khelhna chance a awm ang," tiin inelna an lak thutak thu a sawi.
Mizoram Police coach Lalbiaksanga Colney chuan, "Kan tan chuan chak ngei ngei a ngai a, Aizawl FC lakah hian chetsual theih a nih avangin kan fimkhur tel a ṭul. Point thum hlawhchhuah tumin kan inlan ang a, training kan neih ṭhat avangin beiseina kan nei sang hle," tiin Vanglaini a hrilh.
Police hian hnehna an chang zo lo a nih chuan match hnuhnung berah semifinal khel tura an elpui leh an intawn hmasak ṭuma an hneh loh Electric Veng an hmachhawn dawn a, knockout stage thleng lo thei an la ni.
MPL7 Khelh Hmabak
Round 13
November 13, Thawhlehni
Aizawl FC 2:30 PM Mizoram Police
Ramhlun North 7:00 PM Chhinga Veng
November 14, Nilaini
Bethlehem VT 2:30 PM Chanmari FC
Electric Veng 7:00 PM Chawnpui
Round 14
November 16, Zirtawpni
Ramhlun North 2:30 PM Chawnpui
Mizoram Police 7:00 PM Electric Veng
November 17, Inrinni
Chhinga Veng 5:30 PM Bethlehem VT
Chanmari FC 8:00 PM Aizawl FC
ROUND 11
November 19, Thawhtanni
Chhinga Veng 7:00 PM Aizawl FC
SEMIFINAL
First Leg
November 22, Ningani
Position 1 7:00 PM Position 4
November 23, Zirtawpni
Position 2 7:00 PM Position 3
Second Leg
November 28, Nilaini
Position 4 7:00 PM Position 1
November 29, Ningani
Position 3 7:00 PM Position 2
FINAL - December 7, Zirtawpni
# Team Pld W D L GF GA GD Pts
1 Chhinga Veng FC 11 8 2 1 15 6 9 26
2 Aizawl FC 11 6 4 1 22 9 13 22
3 Mizoram Police 12 6 0 6 19 13 6 18
4 Electric Veng FC 12 5 2 5 13 15 -2 17
5 Chanmari FC 12 4 3 5 14 16 -2 15
6 Chawnpui FC 12 3 5 4 13 16 -3 14
7 Ramhlun North 12 2 4 6 14 26 -12 10
8 Bethlehem VT 12 2 2 8 12 21 -9 8