Zanin dar 7:00-ah Chhinga Veng leh Ramhlun North

Mizoram Premier League champion lai Chhinga Veng chuan semifinal an lut tawh a, zanin dar 7:30-a an khingpui tur Ramhlun North erawhin relegation playoff pumpelh chu an beisei theih sang ber a ni tawh.

Chhingcows hi an hnuaia awm Aizawl FC-in an la umphak theih avangin point thum hmuh a la pawimawh a, chutihrualin knockout stage thlir chungin team an inchhin chhoh ṭan a ṭul dawn.

Ramhlun North erawh an hnuaia awm Bethlehem Vengthlangin aiin point hnih chauhin an hmu tam a, relegate theih dan a la awm. A êng zawnga thlir chuan Ramhlun North hi BVT aiin head to head-ah an ṭha zawk a, point hmu tawh lo pawh ni se BVT hian Chanmari leh Chhinga Veng te lak aṭanga point thum an hmuh chauhin an relegate thei a ni.

Chutihrualin Ramhlun North tan relegation playoff pumpelh tur chuan parukna nih phak a ngai a, Chhinga Veng hneh a ṭul dawn. An match hnuhnung berah Chanmari nen an inhnehtawk a, hemi hma chiaha Mizoram Police an hneh bawk avangin Chhingcows hmachhawn turin an inpeih ang.

MPL7 hmain Ramhlun North-in 'Chhinga Vengin min hneh ngai lo' tih ṭawngkam an hmang thei ṭhin a, amaherawhchu tun season-a an intawn hmasak zawk ṭumin 2-1 a inlehthaltir avangin an record duhawm tak hi a tawp tawh a ni.