Manchester khawpui a 'pawl' leh ta!

Pathianni zan khan Manchester derby khelh a ni a, Manchester City chuan an hmelma kumhlun Manchester United 3-1 a hnehin Premier League hmahruaitu an ni leh ta.

City tan David Silva, Sergio Aguero leh Ilkay Gundogan ten goal khat

ṭheuh an khung a, Manchester United tana Anthony Martial-a penalty chhuih luh chu mualpho zualpui khuhna chauh a ni.

Manchester derby khelh a nih hmain Liverpool chuan 2-0 a Fulham an hneh avangin league hmahruaitu an ni a, an hmahruai chhung erawh a rei lo hle.

Red Devils coach Jose Mourinho chuan, "Anni chuan min hmachhawn hmain friendly match pahnih an nei a ni," tiin City fixture awlsam a chhuanlam a, a nihna tak erawh kawng tinrengah United hian City an ngam lo, tih hi a ni.

City an thiam

Inkhel ṭantir aṭangin Manchester City goal nawr a na nghal a, United-in City goal nawr na tak an khan meuh lo a ni ber - minute 12-naah David Silva chuan goal hmahruai a khung nghal a, inkhel boruak thlirin a mak lo.

United-in goal an chhuah hnuah na taka nawr let tura beisei an ni a, mahse beisei angin an nawr thei tlat lo. Red Devils tlarhma aiin an tlarhnung kan hmu ngun zawk a, Sergio Aguero, Raheem Sterling leh Bernardo Silva te hmuh tur an awm ngun hle.

City-in goal an khung hma ngaihtuahin an goal hnihna erawh an khung thei lawk bik lo a, chawlhlawk hman phawt an mamawh. Minute 48-naah Aguero a inlar a, Argentine striker hian Riyad Mahrez nen mawi taka ball an inpek kual hnuah an goal hnihna a khung.

United an tlu reng bik lo. Minute 58-naah bench aṭanga luhtir Romelu Lukaku chuan penalty a hlawh chhuak a, Anthony Martial chuan goal-ah a chantir a, an beiseina a nung sawt.

Mahse maw...

United-in goal an khung hnuah an khelh danin awmzia a nei ṭan a, Etihad Stadium-ah an si phurh sut mai theih beiseina nen an khel a, mahse hun tawp nan minute li chiah a awm tawh tihin he beiseina hi thamral tir zui a ni.

Bench aṭanga luhtir Gundogan chuan United tlarhnung pherh karah an goal thumna a khung a, United beiseina a thamral tir zui - he goal luhna tura City thiamna chu hmuh hmaih a thiang lo.

Gundogan-a'n goal a khung hma hian City hian vawi 44 ngawt ball an in pass kual hman a, hei hian chiang takin Pep Guardiola hnuaia City football hmuhnawm a hrilhfiah.

September 2015 khan Juan Mata chuan Manchester United tan Southampton lakah goal a khung a, he goal hnua goal khung tura team-in ball an in pass hnem ber a ni.

Chhuanlam zawng Mou

Manchester United boss Mourinho-a'n ṭum dang ang bawkin chhuanlam a zawng a, an chak loh chhan chu City fixture hautak loh zawk vang a nih thu a sawi.

City hian United an hmachhawn hmain Southampton leh Shakhtar Donetsk an hmachhawn a, goal 12 khungin an lamah goal khat chiah a lut thung. United hian khualmualah Bournemouth leh Juventus an hmachhawn thung.

Portuguese manager chuan, "Kar khat chhunga khualmuala match pathum nei a, a bik takin Juventus laka game harsa tak khel zo hlimin friendly match pahniha Southampton leh Shakhtar mikhualtu kan hmachhawn a ni," a ti!

Mourinho chuan sawi zawmin, "Player-te taksa a chau a, an rilru thlengin a nghawng a ni. Match hautak zet khelh zawh hlima match harsa tak dang khelh chu a harsa a, a mi nghawng hi a na em em a ni," tiin fixture hautak a chhuanlam.

Fak tlak City

Manchester City manager Pep Guardiola chuan, "Kan fan-te hmaah a ṭha thei ang bera khelh kan duh a, he game pawimawh zia hi kan hre reng bawk a ni," tiin an chak chhan a sawi a, fan-te hlimna thlen tuma theihtawp an chhuah thu a sawi.

Man City tan Aguero-a'n striker hriam a nihzia a pholang nawn leh ta a, goal a khung chiah khan City tan league match 218-a goal 151 a khungna chiah a ni a, inelna hrang hrangah match 307 khelin goal 208 ngawt a khung sak ta!

Kum 32 mi Silva-a'n a kumin tam lam pan tawh mah se a thiam ngaiin a la thiam reng tih a pholang nawn a, ball chang tura hmun awl insiam a thiam a, hmun chep tak karah ball a keng thei a, game 'control' tu ber a ni.

Fernandinho-a'n kum 33 kai tawh mah se a thawhrim ngaiin a la thawkrim reng a, Brazilian midfielder hian a phu angin fak hlawh tawk lo mah se a thawhrimna leh class sanna chu hmuh hmaih theih a ni lo.

Nomawi = Nakin

Manchester derby-ah an chak lo a, Mourinho-a'n nomawi a sawi ri ngam rih lo. Chelsea boss hlui chuan, "Top four pawn lamah kan awm a, title chungchang sawi thei kan ni lo.

"Kan tum hmasak ber tur chu top four-a awm a ni a, chuta ṭang chuan nomawi chungchang chu kan sawi ve chauh ang," a ti a, United tan nomawi sawi hunah a la ngai lo.

United hian City lakah hliam vangin Paul Pogba an chhawr thei lo a, French midfielder hian sawisel hlawh ṭhin viau mah se a tel lo chuan United midfield a kim lo tih a lang a, Pogba an ngai.

Mourinho chuan, "A chang chuan khelh chhiat vangin kan tlawm a, a chang chuan tihsual vangin kan tlawm thung. Zaninah chuan tihsual vanga tlawm kan ni," a ti a, an khelh chhiat a pawm duh lo.