Federer a chak lo phawt

ATP Finals chu Pathianni zan aṭang khan khelh ṭan a ni a, champion tura rinkai Roger Federer chu a group match hmasa berah a chak lo nghal, Swiss star tan semifinal lut tur chuan a match hmabak dang pahnihah chak ngei a pawimawh tawh ang.

Kum 37 mi Federer-a'n tennis a khelh hun chhunga a nomawi 100-na chawi tumin inelna a hmachhawn a, mahse Japanese tlangval Kei Nishikori lakah 7-6 (7-4), 6-3 in a chak lo nghal.

Grand Slam vawi 20 champion tawh Federer hian vawi 34 ngawt unforced errors a nei a, set hmasa zawk an khelh laiin ṭul lo takin mipui lama ball a vuak avangin umpire-in a khak hial. A chak loh chhan hi a khingpui khelh ṭhat vang chu ni bawk mah se tihsual a ngah lutuk a tuar a ni.

Swiss tlangval Federer hian bul a ṭan fuhin nidang ang bawkin hnehna a chnag thei tura beisei a ni. Set hmasa zawka game lina an lak laiin a khingpui service a chhuhsak ngei dawn niin a lang hman a, deuce an neih hnuah a tihsual vangin set a la lo. Set hnuhnung zawkah pawh Nishikori zawkin inrintawkna a neih phah a, match point a hmuh hnuah pawh Federer tihsual vang bawkin point a hmuh belh.

Group Lleyton Hewitt-ah hian player pali an awm a, an group match inkhel dangah Dominic Thiem chu Kevin Anderson lakah 6-3, 7-6 (12-10) in a tlawm ve thung. Zaninah Federer leh Thiem an inkhel zui ang a, hnehna changtu Anderson leh Nishikori an intum ve leh bawk ang.

Juan Martin del Potro a inhnuh-dawh vanga inlan ve thei chauh Nishikori chuan, "Ka mi ngaihsan em em nena inkhelh hi engtik lai mahin a awlsam ngai lo, ka tan chuan ani laka hnehna chan hi a hluin a ropui bik em em a ni," tiin a sawi.

ATP Finals bika vawi ruk champion tawh Federer chuan, "Kan inkhelhna court hi ka inlan hnuhnung ber ai kha chuan a danglam tawh, ball a kal muang zawk hle a ni. Chutih rualin player dang pawhin chhuanlam an siam lo a, keiin chhuanlam ka nei thiang bik lo," tiin O2 Arena chungchang a sawi.