Barca tlawm zanah Real an chak

La Liga hmahruaitu Barce­lona-in rin loh takin an mikhual Real Betis chu 3-4 in an ngam lo a, league hmahruaitu nih chhunzawm zel mah se an hnuaia awm Sevilla, Atletico Madrid leh Alaves aia an sanna chu point khat chauh a ni tawh!

Barcelona tan hliam vanga a chawlh reng hnuah Lionel Messi a lo kir a, Argentine for­ward hian a lo kir lehna inkhelah goal hnih khung mah se an chak zawh loh miau avangin a ropuinain fak a hlawh lo.

Real Madrid pawh season

ṭantirah beisei phak lo viau mah se coach lailawk Santiago Solari hnuaiah insiamṭhain hnehna an chang ve zel a, Barca hi point li chauhin an thlau leh tawh - champion turin beiseina an nei.

European champion hian an mikhualna ramah Celta Vigo chu 4-2 in an hneh a, Solari hnuaia match li an khelh­ah hnehna an chang vek. He thuziak i chhiar meuh chuan Argentine coach hi Real manager nghet a ni tawh hial ang.

Nou Camp a nghing!

Barcelona khelmualah Real Betis an chak a rinawm lo a, mahse a thleng miau si - minute 20-na lekah Junior Firpo chuan an phu ang ngeiin goal hmahruai a khung a, Nou Camp a reh duk.

Catalan club-in an fight let dawn emaw tih laiin minute 34-naah goal an chhuah nawn a, Spanish rawlthar beiseiawm ni ṭhin, kum 37 mi Joaquin chuan Betis goal hnihna a khung.

Messi kir avanga hlim Barca fans an nguai a, goal dang lut loin chawlhlawk hman a ni a, rin loh takin Betis-in 2-0 a hma hruai chungin dressing room lam an pan.

Second half ṭan a nih hnuah Barca beiseina tih nun thar a ni a, Barca fan-ten an hmuh duh Messi an hmu - kum 31 mi forward hian penalty aṭangin an si phurh a sut ṭhen a, Barca fan-ten beiseina thar an nei.

A rei si lo!

Barca fan-ten 'comeback' hmuh an inbeisei a, an hlim chhung erawh a rei lo. Messi goal khung avanga an hlim authawm pawh a reh fel hmain goalkeeper Marc-André ter Stegen a chesual a, Giovani lo Celso chuan an goal thumna a khung.

Catalan club beiseina thi mai tur chhem nung turin Arturo Vidal a inlar a, minute 71-naah an si phurh a rawn sut ṭhen ve leh. Mahse, Barcelona bawk an talbuai a, comeback tura insiamṭhat an tum lai takin Ivan Rakitic chuan a yellow card pahnihna a hmuh avangin hnawhchhuah a ni.

Croatian midfielder hnawh­chhuah a nih hnuah Sergio Canales chuan an tam chhawr

ṭangkaiin Betis goal lina a khung leh zui a, injury time-a Messi goal hnihnain awmzia a nei pha ta lo - 3-4 in Barca an tlawm a, kum hnih hnuah Nou Camp-ah an tlawm ve leh ta.

Barcelona-in hnehna chang lo mah se Messi ropuina erawh sawi nep theih a ni lo. Goal hnih a khung leh tak avangin tun season-ah league match sawm aṭangin goal kua a khung a, inelna hrang hrangah match 13 khelin goal 14 a khung.

Solari-a Madrid!

Real Madrid-in Solari hnuai­a an match linaah a vawi li nan hnehna an chang leh ta a, Karim Benzema, Gustavo Cabral (own goal), Sergio Ramos leh Dani Ceballos ten goal khat ṭheuh an khung.

Benzema hian minute 23-na lekah goal hmahruai a khung a, goal dang lut loin chawlhlawk an hmang. Minute 56-naah Benzema bawk kan hmu a, a shot-in post a per hnuah Celta defender Gustavo Cabral per lehin goal-ah a lut daih!

Celta-in an goal hnihna an chhuah aṭanga minute nga hnu lawkah Hugo Mallo volley tawih zet hmangin an si phurh an sut ṭhen a, an phur thar. Mahse, minute 83-naah Sergio Ramos chuan awlsam takin penalty a chip lut a, own goal neitu Cabral hnawhchhuah zui a nih avangin Celta tan comeback a beiseiawm tawh lo.

Hun pek belhah Real tana Dani Ceballos khung chu Brais Mendez chuan minute 94-na velah chhanglet ve leh mah se an mualpho zualpui khuhna chauh a ni tawh a, Real an chak.