Real Madrid mualah PSG fiahna
Zahawmna hi suma lei theih loh, hlawhchhuah ngai a ni. Club lian leh ropui nihna pawh nomawi chawi hmanga nemngheh ngai a ni - sum chu pawimawh mah se, pawisa hmanga lei zawh vek theih a ni ngawt lo.
Paris Saint-Germain pawhin club ropui nih ve an duh, sum seng hnem tawh mah se tun thlengin Champions League nomawi erawh an la chawi lo. Zanin dar 1:30 hian champion hnem ber Real Madrid khelmualah an lenglut ang.
Paris khawpuia an inkhelh ṭum khan, hun tawp dawnah Kylian Mbappe-a'n goal awmchhun a khung. PSG hian goal khat an nei sa, quarterfinal lut tura dinhmun ṭha zawk an ni mek, mahse minute 90 an la neih chu zaninah an khel zo dawn.
PSG an ṭha tawk
Lionel Messi, Neymar leh Mbappe te inkawp aia tlarhma lama duhthlan tur dang an awm chuang lo. PSG hian si ban nghak aṭanga a hmasa ber thlengin player ṭha an kawl, tawnhriat nei ṭha Sergio Ramos erawh an lakluh chhan angin an la chhawr thei lo.
Ligue 1 hmahruaitu hian player nei ṭha viau mah se kartawp inkhelah Nice an ngam lo. Messi, Neymar leh Angel di Maria te inkawpin minute 90 chhungin target zawnah vawi hnih chiah an pet, zaninah erawh Mbappe hoin a ni dawn.
France international Mbappe hi PSG hmatawng zinga hriam ber a ni a, training-na lamah hliam tenau a nei nia sawi ni mah se, nimin khan training pangngai a nei - Real Madrid tan chanchin ṭha a ni hran lo ang, an player awh em em an hmachhawn leh a ngai dawn.
100% a ngai
An intawn hmasaka midfield thununtu PSG midfielder Marco Verratti chuan, "Second half khel tur ang chauh kan la ni, first leg result kha chu kan theihnghilh a ngai. Player ten 100% kan chhuah a ngai, Madrid hmachhawn nan chua 80% chu a tawk lo ang.
"Paris-a kan inkhelh ang ngawt kha a ni dawn lo. Madrid khawpuiah chuan team dang daih an ni dawn, chutihrualin Messi, Neymar Jr, Di Maria leh Kylian te kan nei a, kan chetsual loh chuan tal put thei reng tur an ni hlawm," tiin a ṭhiante a ringtawk.
Italy international hi midfield laia an hmachhuan a ni leh dawn. Tawnhriat nei ṭha Luka Modric nen inkhel awptu zawk nih an inchuh leh ang, palian lo ve tak ni mah se, an thiamna leh finna chu player dang thunun nan a tawk leh hle ang.
Madrid an inpeih
An inkhelhna tur hi Santiago Bernabeu Stadium a ni miau a, mikhual team chu chak lo zawk tura rinna a lian. Carlo Ancelotti-a'n tun hma lama thilmak a lo tih fo tawhna hmunah hian thawhchhuah an tum ang, first leg-a mahni goal veng chunga khel khan zaninah chuan an nawr tawh ang.
PSG hmatawng ṭhatzia kan hria; Real tlarhmate an nep bik lo - tun season inelna hrang hranga goal 27 khungtu Karim Benzema an nei a, rawlthar Vinicius Junior nen an inkawp fuh. Anni pahnih hi PSG lakah pawh an hmachhuan tur a ni dawn.
La Liga lama hnehna an chan hnuah Ancelotti chuan, "Real Sociedad kan hneh dan entu Real Madrid fans chuan PSG lakah kan comeback theih an ring ngei ang, inrintawkna nasa tak kan insiam," tiin a naute chu goal khung tura an inpeih thu a sawi.
Kroos a chiang lo
Thawhṭanni khan Toni Kroos-a'n ball nen training a nei thei tawh. Real Sociedad laka khel thei lo Kroos leh Fede Valverde te dinhmun a chiang lo a, an hmun ruakah Eduardo Camavinga chu La Liga lamah a khel ṭha viau.
Italian manager Ancelotti chuan, "Camavinga pawh khel thei zinga mi a ni. Mahse, Kroos leh Valverde te dinhmun kan ngaichang phawt ang," tiin a sawi a; Modric leh Casemiro te dinpui tur a la tichiang thei lo.
Spanish club lian tan Paris khawpuia an khelh ang kha a remchang dawn lo, tlang tur chuan goal an khung ngei a ngai dawn a; tawnhriat nei ṭha Ancelotti-a'n na taka PSG tlarhnung a nawrtir tur hi football ngainatute tan chuan en a manhla khawp ang.
UCL Last 16
First leg
February 15, Thawhlehni
Paris Saint-Germain 1 - 0 Real Madrid
PSG: Kylian Mbappe 90+4'
Sporting Lisbon 0 - 5 Manchester City
MAN: Riyad Mahrez 7'; Bernardo Silva 17', 44'; Phil Foden 32'; Raheem Sterling 58'
February 16, Nilaini
RB Salzburg 1 - 1 FC Bayern Munich
RBS : Chukwubuike Adamu 21'
FCB : Kingsley Coman 90'
Inter Milan 0 - 2 Liverpool
LFC : Roberto Firmino 75'; Mohamed Salah 83'
February 22, Thawhlehni zan
Chelsea 2 - 0 Lille
CHE: Kai Havertz 8'; Christian Pulisic 63'
Villarreal 1 - 1 Juventus
VIL: Dani Parejo 66'
JUV: Dusan Vlahovic 1'
February 23, Nilaini zan
Atletico Madrid 1 - 1 Manchester United
ATM : Joao Felix 7'
MNU : Anthony Elanga 80'
Benfica 2 - 2 Ajax
BEN : Sebastien Haller 26' (OG); Roman Yaremchuk 72'
AJX : Dusan Tadic 18'; Sebastien Haller 29'
Second Leg
Nizan Inkhel (Result kan hre hman lo)
Bayern Munich 01:30 AM RB Salzburg
Liverpool 01:30 AM Inter Milan
Zanin Inkhel tur
Manchester City 01:30 AM Sporting Lisbon
Real Madrid 01:30 AM Paris Saint-Germain
March 15, Thawhlehni zan
Manchester United 01:30 AM Atletico Madrid
Ajax 01:30 AM Benfica
March 16, Nilaini zan
Juventus 01:30 AM Villarreal
Lille 01:30 AM Chelsea
*UCL-ah away goal rule a awm tawh lo.
*Second leg hi March thlaah khelh a ni ang.
*Quarterfinal aṭangin draw neih ṭhat leh tur a ni a, tute pawh an inhmachhawn thei ang.