Man City tan hna harsa a awm tawh lo

Manchester City chuan zanin dar 1:30 hian an hmelma Manchester United 4-1 zeta an sawpna hmun Etihad Stadium-ah Sporting Lisbon an mikhual dawn. Pep Guardiola hote hian Portuguese champion hi khualmualah 5-0 in an sawp a, tun season Champions League-ah away goal rule awm tawh lo mah se English champion tan quarterfinal luh a harsa tawh lo.

English club hian hrem vangin Kyle Walker an la chhawr thei dawn lo a, Tottenham defender hlui Walker awmnaah Joao Cancelo dahin vei lamah Ukrainian defender Oleksandr Zinchenko a awm thei ang.

Man City hian hliam vangin Ruben Dias, Cole Palmer leh Zack Steffen te an la chhawr thei lo a, an tel loin an buai lo tih chu Manchester Derby-ah a lang tawh. Chutihrualin fimkhurna tur erawh an nei, Kevin De Bruyne-a'n yellow card a hmu leh a nih chuan quarterfinal first leg-ah a inlan thei dawn lo. Germany international Ilkay Gundogan tan hun ṭha a ni thei ang.

Pep-a hote hi goal lia an chak lo a nih pawhin quarterfinal an lut dawn a, goal ngaa an chak lo a nih pawhin extra time an la khel dawn. Man City tan hlauhthawnna tur a awm lo a, an khelhna tur hi an mual a nih bawk avangin an chak a rinawm zawk.

English club hian Pep Guardiola an lakluh hnuah England-a inelna hrang hrang an thunun a, amaherawhchu Europe-ah an la champion thei lo. Hemi a nih avang hian Barcelona ropui taka enkawl tawhtu Pep-a meuh a famkim lo tihna a ni.

Spanish manager hian squad ṭha tak nei a, Champions League bakah Premier League lamah Liverpool-in pressure an rawn pek nat leh tak avangin Pep pawh khelmual pawn lamah a inven lawk. Bayern Munich manager hlui Pep hian nipui bazarah striker an mamawh thu a, tun season leh zanin atan chuan tuna a neihsaah a lungawi a ṭul ang.

First leg an khelh zawhah Pep Guardiola chuan, "Kan khel ṭha takzet. Quarterfinal thlen nan match khat khelh kan la mamawh. Player-ten min hria a, kan hnathawh dan pawh an hria, kha ai khan kan la khel ṭha thei a ni. Ka lawm lo a ni lo a, ka lawm takzet. Mahse hma kan la sawn thei a ni," tiin a sawi a, 5-0 in chak tawh mah se second leg pawh an la thutak ngei ang.