ISL (league round)-ah MPL chhuak 3 awmna Jamshedpur FC an champion

Indian Super League (league round) ah Mizo player pathum awmna Jamshedpur FC aia thiam an awm lo - match 20 khelh hnuah point hmu hnem berin League Winners’ Shield an hlawh chhuak.

Jamshedpur hian Thawhlehni zan khan league match hnuhnung berah ATK Mohun Bagan chu 1-0 in an hneh a, Ritwik Das chuan inkhela goal awmchhun hi a khung.

Men of Steel hian point 43 hmuin ISL-ah anni aia point hmu hnem an la awm ngai lo - record thar an siam.

Mizo an mawi
Jamshedpur hlawhtlinna hi Mizo football hlawhtlinna a ni tel - player pathumte hi state pawna inzir chhuak ni lo, Mizoram Premier League-a inzir vek an ni.

Bagan lakah hian Laldinliana Renthlei leh Ricky Lallawmawma ten inkhel bul an ṭan a, Mizo fullback pahnih hian league match 20 an khelhah bul an ṭan vek!

Armed Veng South tlangval Dinliana'n match 20-ah vawi hnih assist a nei a, vawi 69 tackle neiin, clearance (35) leh block (27) a neih zat pawh a team tan ṭhatpui tham a ni.

Durtlang tlangval Ricky-a'n match 20-ah assist vawi khat a nei a, hero of the match vawi khat a ni a, tackle (55), clearance (33) leh block (35) a nei.

MPL rah
Ricky-a'n MPL-ah a career ṭanin, Aizawl FC, Chanmari leh Zo United tan a lo khel tawh a; Dinliana pawh Bethlehem Vengthlang FC-ah bul ṭanin Chhinga Veng FC-ah inchherin Aizawl FC-ah pawh a lo khel tawh.

Bagan lakah Samthang tlangval Dinpuia chu bench aṭanga luhtir a ni a, Dinliana a thlak. MPL best defender pawh lo ni tawh Dinpuia hian Bethlehem Vengthlang, Chhinga Veng, Electric Veng FC leh Aizawl FC tan a lo khel tawh.

Dinpuia tan tun season hi ISL-a a season hmasa ber a ni a, Ricky leh Dinliana angin hmun chang tam lo mah se a bul ṭan nan chuan a chhe lo - match li-ah a inlan.

JFC hausak belh
Jamshedpur hi league round hmahruaitu an ni a, champion tur erawh semifinal & final hmanga la zawn leh tur a ni - Men of Steel hian hmahruaitu ni chunga league round khar manah vaibelchhe 3.5 an dawng.

ISL champion-in vbc. 6 dawngin, pahnihnain vbc. 3 an dawng ang a, semifinal-a chak lo team hian vbc. 1.5 ve ve an dawng dawn. Jamshedpur hi semifinal-ah chak lo pawh ni se vbc. 5 tal chu an dawng dawn tho tihna a ni.

JFC boss Owen Coyle chuan, "League match 20 chhungin India-a team ṭha ber kan ni tih kan pholang a, match 20 ngawt hi chu vanneih vang a ni thei lo," a ti.

Goal 21 an chhuahin chhuah tlem ber an ni a, goal 42 an khung a, anni aia khung hnem chu Hyderabad (43 goals) chiah an ni.

Champions League?
Season dang ang chu ni se ISL league round hmahruaitu hi AFC Champions League khel tur an ni. Mahse, Asian Football Confederation-in kal dan phung an thlak a, March - November inkara inelna kalpui ṭhin chu November-May anga kalpui a ni tawh dawn.

Hei vang hian season thara Champions League khelh ṭan hun chu November 2023 tihna a ni dawn a, hetih hunah hian ISL 2023 khelh zawh a nih leh tawh dawn avangin ISL-in league round hmahruaitu pahnih a nei hman dawn tihna a ni.

Hetiang boruak karah hian tun season-a league round champion nge season thar champion-in Champions League khel dawn a la sawi theih loh.