May thlaah PVL khel dawn

Mizoram Volleyball Association (MVA) hnuaia inelna lian ber, tualchhung player ṭha an kimna Pro Volleyball League chu khelh a ni leh dawn. Hripui vanga kum hnih an chawlh hnuah PVL hi kumin May 6-27 chhung hian R. Dengṭhuama Indoor Stadium, Mualpuiah khelh a ni ang.

Tournament buatsaih tur hian MVA senior vice president Lalmalsawma Nghaka leh LPS vision director Lalsawmliana Pachuau te chuan inremna an ziak fel a, inkhel hi LPS-ah live a pekchhuah leh a ni dawn.

Inelnaah hian mipa team panga - champion lai Chhinga Veng Spiker, Durtlang North, Hunthar, TNT leh Tuichangral an inel dawn. Hmeichhe team pali - champion lai Durtlang, Bungkawn, Bethlehem Vengthlang leh Kanan an inel bawk ang.

Kum 2019 kha tournament khelh hnuhnun ber niin, set hmasa pahnih an hloh hnuah ropui takin Chhinga Veng an tho chhuak a, final-ah 3-2-in Durtlang North an hneh a, a vawi khat nan an champion.

Inelna tur chungchang sawiin MVA general Secretary C. Lalrokhuma chuan, "2020 khan a hun pangngai anga tih leh tumna awm mah se Covid-19 leng inkhuahkhirhna avangin inkhelh theih a ni lo.

"2020-21 season-ah neih ngei tumin engkim ruahmanna a awm tawh a, mahse, hripui leng leh sum harsatna innang avangin thulh leh a ni," a ti. Kuminah chuan hripui vanga harsatna a awm tawh loh hram an beisei.