United manager hlui Frank O'Farrell a thi

Manchester United manager hlui Frank O'Farrell chu kum 94 mi niin a thi a, Leicester City, Cardiff City leh Iran coach pawh a lo ni tawh.

United coach ropui ber pawl Sir Matt Busby chuan kum 1971 khan O'Farrell hi amah thlak turin a thlang a, mahse, thla 18 chiah Old Trafford-ah a cham hman tihin a hna aṭanga chawlhtir a ni.

Red Devils chuan an coach thlahna thu ziakin, "Kan manager hlui Frank O'Farrell thihna hian min ṭhawng takzet a, he hun harsaah hian a chhungte leh a ṭhiante tan kan ṭawngṭai a ni," an ti.

Manchester chuan, "United-a thla 18 a awm chhungin kan duhthusamte thleng lo mah se, manager theihna nei sang tak leh pa ropui tak a nih thuah erawh inhnialna tur a awm lo," tiin an coach hlui hi an thlah.

Player a nih laia West Ham United leh Preston North End tan pawha lo khel tawh O'Farrell hian kum 1961 khan Weymouth aṭangin a coaching career a ṭan a, kum 1965 khan Torquay United a zawm.

Torquay hi kum 1966 khan Division Four nomawi a chawipui nghal a, kum 1968 khan Leicester City a zawm. Foxes hi 1969 FA Cup final a hruai thleng nghal a, 1971 Division Two title a chawipui bawk.

Kum 1971 hian United a zawm a, ban a nih hnuah Cardiff, Iran, Torquay leh Al-Shaab a enkawl leh a, Torquay hi 1981-82 inkarah enkawl lehin a coaching career chu a mangṭha.

Cardiff hi kum 1974 khan Welsh Cup-ah a champion pui a, Iran chu Asia Games (1974)-ah gold hlawhchhuahpuiin, Asian Cup 1976-ah a champion pui bawk.

United-ah erawh chhuan tur a nei tlem hle - a season hmasa berah pariatna a nihpui a, December 1972-a ban a nih khan Division One-ah a hniam lam aṭanga chhiarin pathumna an ni.

Hammers pawhin an player hlui hi thlahin, "Kalphung nghet nei, pa hawihhawm leh kawm nuam, amah hrechiangtuten an ngainat leh zah em em a ni," an ti a, Torquay chuan, "Club legend a ni a, a hmun ruak hi hnawh khah ni thei dawn ngai lo mah se, a career-a a hlawhtlinna tam tak kan hnena a hmang kha kan lawm a ni," tiin an thlah ve bawk.