Liverpool hmachhawn tur Forest

FA Cup fifth round match hnuhnung berah Nottingham Forest chuan 2-1 in Huddersfield Town an hneh a, quarterfinal-a Liverpool hmachhawn turin an inpet tling.

Huddersfield tan Tom Lees chuan minute 13-na lekah goal hmahruai khung mah se Forest-in first half chhung vekin an chhanglet a, Sam Surridge leh Ryan Yates ten goal khat ve ve khungin an chak.

English football club ropui ber pawl Nottingham Forest hian kum 1996 hnuah khan FA Cup quarterfinal an la khel leh lo a, kum 20 chuang hnuah FA Cup-a a thiam pariat zingah an tel ve leh ta.

VAR a tel lo
Forest tan Surridge-a'n hma takah goal hmahruai a khungah a inngai a, mahse, assistant referee-in offside a phar avangin goal-ah pawmsak an ni lo - Forest lam lungawi lo viau mah se video assistant referee hman a ni tlat lo.

FA Cup-ah fifth round thlengin Premier League ground-ah lo chuan VAR hman a ni lo - Forest leh Huddersfield hi Championship club ve ve an ni a, VAR hmanna khelmual a nih loh avangin VAR rawn tur a awm lo tihna a ni.

English football-a club inelna ngaihhlut hlawhah hian quarterfinal aṭang erawh chuan VAR hman a ni tawh dawn a, Forest pawh hian an mualah Liverpool mikhual dawn mah se VAR hman a ni tawh ang.

VAR a ngai lo
Offside vangin Forest goal khung pawm a ni lo a, mikhual team Huddersfield tan Tom Lees chuan goal hmahruai a tauh lut zui - Forest an hawihai a, goal khung pawmsak loh team tan minute tlemte chhunga thil inher dan chu lawmawm lo tak a ni.

Mahse, mahni muala khel Forest-in quarterfinal khelh ngei an duh. Goal an chhuah aṭanga minute 16-naah Surridge chuan ṭha zetin si phurh a rawn sut a, Stoke City aṭanga an hawh striker-in a club thar tana goal a khung hmasak ber a ni nghal.

Forest an phur laklawh - chawlhlawk hman a nih hmain Surridge goal khung tur siamsaktu Ryan Yates chuan James Garner-a freekick aṭanga ball kal chu a tauh lut ve leh a, hun tawp thlenga goal dang lut loin Forest an chak.

Quarterfinal
FA Cup-a a thiam pariat zingah Championship club pahnih, Middlesbrough leh Nottingham Forest an tel a, a bak club paruk erawh Premier League khel vek an ni.

Boro hian European champion Chelsea an mikhual dawn a, Forest-in Liverpool an hmachhawn dawn bawk - Championship club pahnih tan quarterfinal piahlam mitthla a harsa ang tih a chiang a, mahse, single leg-a khelh tur inelnaah hian mahni muala an khelh dawn avangin beisei tur erawh a awm.

FA Cup quarterfinal-ah hian Premier League club intawng tur an awm dawn a, Crystal Palace-in Everton an mikhual laiin Manchester City chuan Southampton an tlawh bawk ang.

March 7, Thawhṭanni Zan
Nottingham Forest 2 - 1 Huddersfield Town
BOT: Sam Surridge 29'; Ryan Yates 37'
HUD: Tom Lees 13'

Quarterfinal Fixtures

March 19, Inrinni Zan
Crystal Palace 8:30 PM Everton
Southampton 8:30 PM Manchester City
Middlesbrough 8:30 PM Chelsea

March 20, Pathianni Zan
Nottingham Forest 11:30 PM Liverpool