Kai thar Rajasthan lakah Aizawl FC an tlawm

I League-ah Mizo club Aizawl FC an che fuh thei lo a, nimin tlai khan kai thar Rajasthan United chu 1-0 in an hneh lo. Mizo club hi match thum an khelh tawhah an la chak lo vek a, point an la hmu lo.

Naihati Stadium-ah Rajasthan tan minute 37-naah Aman Thapa-a'n goal awmchhun a khung a, injury time-ah Aizawl FC defender Robert Primus leh veteran midfielder R. Malsawmtluanga te hnawhchhuah niin hun tawpah player pakua chauh an ni.

A fuh lo
Aizawl FC-in Tajik defender Bakhtior Kalandarov an chhawr thei tawh a, tlarhnungah Primus nen an inkawp. Mual sirah captain K. Lalmalsawma (Buangpuia) leh Lalfelkima te an awm a, Mohammedan hneh lotute aṭangin player pahnih an thlak.

Tlarhma lamah foreigner hmuh tur an la awm lo a, bench-ah Willis Plaza a awm bakah Aser Pierrick Dipanda chu Covid-19 vangin a la khel thei lo. Mizo club an la kim lo a, chutih rualin match thumna a nih tawh avangin insiamṭhat a hun takzet.

Aizawl FC goal bawh a nat tawk loh ang chiahin tlarhnung a phui tawk lo a, minute 37-naah duh thalin Ricky Shabong-a'n dinglam aṭangin a cross a, Aman Thapa-a'n a tauh goal.

Second half-ah Willis Plaza a lut chungin Mizo club-in chance ṭha siam an harsat a, hun tawp lamah erawh freekick leh corner kick hmangin Rajasthan tlarhnung an tibuai. Injury time-ah Rajasthan player box chhungah a tlu a, referee-in a bula awm Primus a hnawt chhuak.

Trinidadian defender Primus hian a khawih fuh chiah em, tih a erawh a hriat loh a, hemi hnu hian MS-a'n Rajasthan wing back Anil Chawan chu mual sirah tackle tluin yellow card vawi hnihna pek a ni leh bawk.

Engtin zel?
Aizawl FC-in point an hlawhchhuah loh bakah red card pahnih an hmu a, March 11, Zirtawpni tlai dar 4:30-a RoundGlass Punjab an hmachhawn hunah Primus leh MS-a te an chhawr thei dawn lo.

Mizo club-in match thuma point an la hmuh loh laiin hmahruaitu Mohammedan-in point kua an hmu tawh. Aizawl FC tan champion sawi a rem rih lo a, a rang lama insiamṭhat a ṭul.

Nizan khan Churchill Brothers leh Sudeva Delhi te an inkhel a, Sudeva-in point an hlawh chhuak a nih chuan Mizo club chiah hi point hmu lo awmchhun an ni tawh ang.

Round 3
March 7, Thawhṭanni
Mohammedan 3 - 1 Sreenidi Deccan
MOH : Marcus Joseph 40', 51'; Andelo Rudovic 89' (P)
SRE : David Castaneda Munoz 16'
Gokulam Kerala 5 - 1 Real Kashmir
GOK : Luka Majcen 4' (P), 38'; Jourdaine Fletcher 5', 27'; Jithin 66'
RKA : Tiago Adan 48' (P)
Trau 0 - 2 Neroca
NER : Mohammad Kdouh 37'; Juan Mera 75'

March 8, Thawhlehni
Rajasthan 1 - 0 Aizawl FC
RAJ : Aman Thapa 37'
Kenkre 0 - 4 RoundGlass Punjab
RGP : Gurtej Singh 15'; Kurtis Guthrie 20', 41'; Robin Singh 73'