Shane Warne Cricket khawvelin an hre reng tawh ang

Khawvela leg spinner ropui ber Shane Warne chanchin hi cricket infiamna hre chin chuan an hre vek ang. A chhan chu 'mi bik' a ni a, Australian spinner hian zun a nei a, 90's chhoa cricket ngainatu te chu Warne-a zunah an uai vek ti ta ila, kan uar lutuk lo ang.

Warne hi March 4, Zirtawpni khan kum 52 mi niin Thailand thliarkar pakhat Ko Samui-ah lungphu chawlin a thi. Australian cricketer hlui hi mi ṭhahnem tak chuan khawvela bowler ropui ber ang hiala an chhal a ni.

Mi bik chu
Australia Test captain Pat Cummins chuan Warne anga mi bik hi chu kum 100 danah mi pakhat chauh an piang tiin a sawi a, hei hian a ropuizia a sawifiah.

Shane Keith Warne hi September 13, 1969 khan Keith Warne leh Bridgette Warne te nupa inkarah a piang. Infiammi ropui dangte ang lo takin professional player a nih ṭan hian a zakzum a, a chum bawk.

Amaherawhchu Warne hi ball vawm vir thiam bik a ni a, a thiam thil hi a thiam bel avangin a pian aṭanga en chi a ni lo. A naupan laiin Australian Rules football team St Kilda reserve team tan a khel hman a, mahse a chemkalna cricket-a insawrbing turin kum 19 a nihin Australian Academy of Sport-ah a inziaklut.

Bul a ṭan
Australian bowler Warne hian kum 21 a nihin first class cricket a khel ṭan a, kum 22 a nihin Australia tan Test match a khel ṭan. An hun lai hian leg spinner hi risk sang bika ngaih a ni a, run an pe tam mah mahah an ngai ṭhin.

Warne pawh a danglam bik lo. Test match hmasa innings paliah wicket khat chauh lain 335 runs a pe a, a cricket career a tawp hman teuh hle.

Amaherawhchu Sri Lanka lakah a che ropui a, ball 31 lekah wicket thum a la a, Colombo-ah Australia a chakpui. WestIndies lakah wicket sarih ngawt a la a, 52 runs chauh a pe.

New Zealand lakah wicket a la hnem chhunzawm a, kum 1993-a Ashes Tour-ah England hmachhawnin 'ball of the century' tih hiala an sawi zui chu a vawm zui.

Warne hmaah tawnhriat nei ṭha English batsman Mike Gatting a ding a, Aussies spinner hian leg stump pawnah vawm sawt mah se ball vir hian wicket a fuh. Vawi khat chet fuh vanga lar a ni lo a, a hnu lam zelah pawh a ropui zui.

A ropui e
Cricket ngainatuten Warne-a ball vawm dan an zir nasa a, a vawm dan chauh an entawn lo - a hmui hnawih var thlengin an uar hle. Warner hi cricketer satliah a ni lo a, football khawvela David Beckham te ang thoa lar tura piang a ni.

Warne hian Test cricket-ah wicket 708 a la a, wicket la hnem ber record a siam. Amaherawhchu a record hi December 2007 khan Sri Lanka spinner Muttiah Muralitharan-a'n a rawn khum.

Australia-in khawvel cricket an thunun theih nan Warne hi a pawimawh a, 1996 World Cup-ah player pawimawh niin final-ah Sri Lanka lakah an vanduai. Kum 1999-ah erawh an vanduai nawn tawh lo a, Australia-in final-ah Pakistan sawpin an champion. Warne hian final bikah wicket li laiin 33 runs chauh a pe a, inelna pumpuiah wicket 20 lain Geoff Allott nen wicket la hnem ber an ni.

Warne-a ropuizia sawifiahtu chu a chawimawina dawn hi a ni a, Wisden Cricketers of the Century-a cricketer panga thlanchhuah zingah a tel. Sir Donald Bradman-a'n vote hmu hnem berin Sir Garfield Sobers leh Sir Jack Hobbs te an awm a, Warne hi palina niin Sir Viv Richards chu panganaah a awm. India cricketer ropui Sachin Tendulkar a tel lo!

Engtin zel?
Warne hian kum 1998 leh 1999 chhung khan Australia tan ODI captain hna a chelh a, match 11 an ram a kaihhruai chhungin vawi 10 chakin vawi khat chiah a chak lo.

Aussies spinner hian kum 2007 khan international cricket a chawlhsan a, club leh county cricket erawh a khel chhunzawm. Kum 2008 khan first class cricket a chawlhsan a, hemi hnu hian commentator hna a chelh.

India rama cricket inelna ngaihhlut Indian Premier League-ah Warne hian sulhnu a nei ṭha, Rajasthan Royals tan captain leh coach hna chelhin kum 2008 khan a champion pui a ni.