Tottenham leh Kane an harh
Tottenham Hotspur chuan Everton 5-0 teh meuhin an sawp a, tluk leh din fawma kal Antonio Conte naute hian season thara Champions League khelh phak an tumna chu an chhawm nung ve leh ta.
Chak lo Everton erawh table mawng lamah an talbuai chhunzawm. Manager Frank Lampard chuan nakkumah pawh English football inelna sang ber khel tura an cham chhunzawm a rin thu a sawi ve thung.
Toffees lakah Harry Kane-a'n goal hnih a khung. Spurs tana Premier League match 270 a khelh aṭangin goal 176 a khung ta. EPL-a goal khung hnem lamah Thierry Henry a khum ta chiah; Chelsea legend Lampard a phak lohna chu goal khat chiah a ni ta bawk.
5 Star Spurs
Thawhṭanni zan Tottenham Hotspur Stadium-a inkhelah mualneitu lamin buaina an nei lo tia sawi ngam a ni. Minute 14-na lekah Everton defender Michael Keane chuan Harry Kane dai khalh a tumna lamah anmahni lamah a ti lut.
Everton defender pawp kara tal put Son Heung-Min chuan goal hmasa luh aṭanga minute thumnaah a khung belh nghal, chawlhlawk hmain striker Kane a inlar a, 3-0 a hma an hruai hma em avangin first half-ah chak tur a chiang tawh.
Second half-ah pawh thil a danglam tam lo. Son-a goal tur siamsaktu Dejan Kulusevski-a'n Kane tana a ball pek chu rem lo deuh mah se Sergio Reguilon tana duhthusam a ni thung a, a vawi li nan Toffees goal a puar pawp.
Tho chhuak turin Lampard-a nauten tih theih an nei lo, kawng engkimah Conte naute an ngam lo. Kane bawkin Matt Doherty-a ball cross chu boruaka a kan laiin a ke vei lamin a hlap lut, English striker goal pahnih hi Doherty siamsak ve ve a ni.
Palina beiseina
February thlatir lam khan Tottenham hian Wolverhampton Wanderers chu 2-0 in an ngam lo. An chak loh hnuah Conte chuan, "Kan tan chuan a sang pali zinga tel phak chu beisei ngam chi a ni tawh lo," tiin a sawi a, a beidawng niin a lang.
Wolves an hneh loh lai hian Premier League table-ah pariatna an ni a, palina an phak lohna chu point nga a ni. Tunah erawh pasarihna ni mah se, an khelh tlemnaah hnehna an chang a nih chuan Manchester United leh West Ham an tlanpel thei dawn.
Spurs manager Conte chuan, "Palina nih tum zinga tel hi ka duh dan a ni, kawng hrang hrangin tun hnaiah hma kan sawn. A awlsam lo ang tih chu kan hre chiang, mah se club ṭha dangte elphak kan tum tur a ni ang.
"Tottenham ka enkawl tirh khan eng emaw kim lo riau a awm, tunah chuan Dejan Kulusevski leh Rodrigo Bentancur te hian chu hmun chu an rawn hnawh khat niah ka ngai. Champions League khelh leh khelh loh chu kan mawhphurhna a ni," a ti.
Inhamtan tum
Premier League match 25 aṭangin point 22 chauh an la hmu - Everton hian English football inelna sang berah, match hmasa 25 china point an hmuh tlem ber ṭum an tawng mek. Relegation zone aṭanga an himna chu point khat chauh a ni hial.
Toffees manager Lampard chuan, "Chona kan hmachhawn lai hian min tibuai lem lo. Kan hmabakah match hautak a la awm dawn, chumi atan chuan ka inpeih tur a ni a, player pawh an inpeih tur a ni ang," a ti.
Season tawp lamah hian - West Ham (A), Manchester United (H), Liverpool (A), Chelsea (H) leh Arsenal (A) te an la hmachhawn dawn a, engti kawng zawng mahin an hmabak hi sawi awlsam chi a ni lo ang.
Team ṭha an hmachhawn hmain Wolves an mikhual dawn a, chumi hnuah indinthar lai Newcastle United an hmachhawn leh ang. Lampard-a naute hian season thara EPL khelh chhunzawm an duh a nih chuan chetsual a rem tawh lo.